Suku 14 Iha Covalima Identifikadu Afeta Inundasaun

Letratu: Diretór SMPC no GDN, Quintino da Costa/Foto RCCT; Jhana Cardoso

Covalima (RCCT) 23-11-22–Autoridade  Covalima liu husi Servisu Munisipal Protesaun Sivil no Gestaun Dezastre Naturais ( SMPC no GDN) Covalima identifika komunidade Suku 14 afeitadu ba inundasaun iha Munisipiu Covalima.

“Ita nia meta anual ita identifika Suku 14 sai suku trajetu bainhira iha tempu udan sempre akontese inundasaun, rai halai, anin sobu uma. Ho nune’e ita estabelese ona komisaun jestaun risku dezastre naturál suku ne’ebé ita  estabelese ona iha suku hitu”, Diretór SMPC no GDN,Quintino da Costa, hateten ba jornalista sira, Kuarta (23/11).

Nune’e nia dehan, servisu munisipal mos  fahe informasaun ba lideransa komunitaria, komunidade sira bainhira tempu udan maka’as komunidade sira iha ona preparasaun bainhira akontese inundasaun taka eletrisidade, prepara hahan maran.

“Ita nia preparasaun ita halo prevensaun fahe informasaun autoridade lokal inan aman konsellu Suku sira, halo preparasaun bainhira udan akontese maka’as hodi rezulta komunidade nia hela fatin komunidade halo preparasaun di’ak” nia informa.

SMPC no GDN estabelese ona komisaun risku dezastre iha Suku sira hanesan Belecasak, Beco, Holpilat, Beiseuk, Kasabauk, Fatumea, Fohorem, Laktos, Fatululik, Taroman, Maudemo, Suai loro, Ogues no Labarai.

SMPC no GDN husu ba komunidade sira atu pasa informasaun bainhira akontese inundasaun nune’e bele buka alternativu bainhira komunidade sira labele hela ona iha sira nia uma,  bele avakua ba sentru evakuasaun.

Reportazen RCCT