Suco Ogues La Asessu Liña Internet, AMC Sei Hasoru Kompaña Tolu

Jornalísta halo intervista ho Administrador Municipio Covalima Francisco de Andrade konaba preokupasaun Komunidade Suco Ogues nian ne’ebe duránte tinan 19 seidauk asessu liña internet no Komuniasaun. Foto RCCT/Tynho Gusmão

Covalima (RCCT) 25-11-21, Relasiona ho publikasaun ne’ebe Midia “Tempo Timor no Buisnis Timor” iha Edisaun Sexta 19/11/21, konaba preokupasaun Komunidade Suco Ogues ne’ebé duránte tinan 19 ona maibe sira seidauk asessu liña internet, Administrador Municipio Covalima Francisco de Andrade promesa sei hasoru direta Kompaña Tolu (Timor Telekom, Telkomsel, Telemor) hodi halo aprosimasaun tanba realidade komunidade sira iha Suco ne’e seidauk asessu liña internet durante tinan barak ona.

“Preokupasaun ida ne’e Kompaña Tolu hanesan Timor Telekom, Telkomsel ho Telemor sira ne’e nia responsabilidade, ha’u la hatene sira maka lakoi tau antena ka halonusa, tanba realidade sira la asessu kleur ona, ha’u sei hasoru Kompaña tolu ne’e, hodi husu sira nia rajaun ne’e tanba saida maka sira ne’e iha vila hela mas Rede la iha” Administrador Munisipiu ne’e dehan iha Salaun Administrasaun Munisipiu (25/11).

Enkuantu Komunidade Suco Ogues kontinua husu ba Kompaña Tolu (Telemor, Telkomsel, Timor Telekom) ne’ebé ezisti iha Timor-Leste atu instala lalais rede internet inklui liña Komunikasaun ba Komunidade Iha Suco Ogues.

Entretantu Pupulasaun iha Suco Ogues hamutuk Ema Na’in rihun 3.104, maka durante tinan 19 ona seidauk asessu liña internet no liña Komunikasaun.

Jornalísta : Tynho Gusmão

Editór       : Chamot Nahac