VIII Governu Konstitusionál
Komunikadu Imprensa
Sorumutuk Konsellu Ministrus nian iha loron 1 fulan-dezembru tinan 2021
Konsellu Ministrus hala’o sorumutuk iha Palásiu Governu, iha Dili, no aprova ho alterasaun ba Dekretu Governu kona-ba Regulamentu Internu husi Komisaun ba Asuntu Tasi ne’ebé aprezenta husi Ministru Defeza, Filomeno da Paixào de Jesus.
Projetu Governu ne’e mai hafoin aprovasaun Dekretu-Lei nu. 39/2020, loron 23 fulan-setembru, ne’ebé kria Sistema Auditoria Marítima (SAM), no prevee ba Komisaun ba Asuntu Tasi, hanesan órgaun ne’ebé iha kompeténsia hodi ezerse kontrolu polítiku ne’ebé efetivu kona-ba atuasaun Autoridade Marítima Nasionál.
Konsellu Ministrus aprova projetu deliberasaun ne’ebé aprezenta husi Primeiru-Ministru Taur Matan Ruak, hamutuk ho Ministru Defeza, Filomeno da Paixão de Jesus, kona-ba ezonerasaun no nomeasaun Xefe Estadu-Maiór Forsas Armadas (KEMFA),no Komandante Komponente F-FDTL sira.
Proposta refere propoin ezonerasaun no nomeasaun ne’e sei submete ba aprovasaun husi Sua Exelénsia Prezidente Repúblika.
Ikusliu, Konsellu Ministrus aprova projetu Dekretu-Lei Governu kona-ba Sentru Akolhimentu Multifunsaun (SAMF), ne’ebé aprezenta husi Ministru Administrasaun Estatál, Miguel Pereira de Carvalho. Sentru akolhimentu sira ne’e maka destina ba alojamentu temporáriu ba vitíma asidente grave no katástrofe sira. REMATA
Fonte Informasaun DNPDML-SEKOMS
