Situasaun La’o Hakmatek Durante Selebrasaun Natal Iha Covalima

Covalima (RCCT) 27-12-21, Segundu Komandante PNTL Munisipiu Covalima Super-Intendente Assistente Polisia Albino Mauzino haktuir, durante selebrasaun Misa Natal iha loron 24-12-2021 kalan to’o loron 25-12-2021 iha Munisipiu Covalima situasaun la’o normal, tanba la iha akontesimentu asidénte no insidénte ruma.

Segundu Komandante PNTL Munisipiu Covalima hato’o lia hirak ne’e iha Salaun enkontru Komandu PNTL Covalima Segunda-feira ohin (27/12)

Ha’u agradese ba ita nia Juven sira no Komunidade Kristaun sira hotu iha Munisipiu Covalima, tanba durante periodu selebrasaun misa Natal ita la iha asidente ita mos la iha insidente ne’ebé bo’ot akontese iha Covalima inklui Postu hitu, insidente ki’ik hanesan lanu ne’e iha duni, maibe sira la hemu iha fatin públiku, sira ida-idak hemu iha sira nia rezidénsia, ne’ebé ita agradese ba ita komunidade sira liu-liu ba jovem sira” Super-Intendente Assistente ne’e dehan iha Salaun Enkontru Komandantu PNTL Covalima (27/12)

Segundu Komandante ne’e enkoraja Juven sira atu manteim ho atitude ne’ebé di’ak hodi simu tinan foun 2022, no nia husu jovem sira bainhira atu tiru fugeti, tenke iha kalan ne’ebé maka simu tinan foun 2022.

ha’u husu ba Juven sira bainhira atu selebra misa tinan foun nian, ita nafatin ho attitude ne’ebé maka diak, depois hau hakrak informa katak, ami autoriza deit tiru fugeti iha kalan fahe ba rua, siknifika katak iha oras zero-zero (00:00) ita simu tinan foun mai iha ne’e maka it abele sunu fugeti, maibe liu tiha ida ne’e labele sunu ona” Mauzino informa.

Entretantu situasaun la’o normal, tantes ne’e mos Komandu PNTL Munisipiu Covalima orienta membru PNTL kompostu husi Batallaun Ordem Públiku (BOP) Unidade Polisia Fronteira (UPF) Unidade Polisia Marítima (UPM) hamutuk ho F-FDTL halo patrollamentu konjunta hodi kontrola juven sira ne’ebé halo prezépiu ne’ebé besik dalan públiku no hemu tua hodi karaoke iha prezépiu.

Jornalista : Tynho Gusmão

Editór       : Chamot Nahac