Silvester Ferreira -Juventude Labele Tur Nonok Tenki Halo Dezenvolvementu

Letratu: Xefe Ekipa Kontributor Komemorasaun 20 Maiu ba dala XX iha Covalima, Silvester Ferreira/Foto; Jhana Cardoso.

Covalima (RCCT)19-05-22 Ekipa Kontributor ba Komemorasaun 20 Maiu ba Dala XX iha Covalima, realiza Seminariu Estudante Sekundaria no Universitariu sira iha Suai, ne’ebé partisipa husi Estudante UNPAZ Ramu Covalima, Estudante sira husi Eskola Teknika Vokasional Krista Suai Laran no Estudante sira husi Eskola Sekundaria Geral Suai.

Sai Orador ba Seminariu ne’e mak Jestor Radio Comunidade Cova Taroman lori materia konaba Papel Media Kombate Hoax no Uza Internet ho Saude, Koordenador UNPAZ Suai, Lori materia konaba Papel Ensino Superior Prepara rekursu Umanu ba Dezenvolvimentu Lokal, Jestor Centro Juventude Covalima, Materia konaba implementa Programa Juventude kontribui ba dezenvolvementu Munisipal.

Iha deskursu Xefe Ekipa Kontributor Komemorasaun 20 Maiu ba dala XX iha Covalima, Silvester Ferreira, enkoraja Juventude sira tenki halo asaun no labele tur nonok deit baihira hakarak halo dezemvolvimentu ba rai ida.

” Moris ne’e labele tur deit tenki koko la’o ba oin atu nune’e ita bele vale iha ema seluk nia matan, labele tur nonok deit tenki halo asaun atu nune’e ema seluk bele dehan ba ita o ne’e vale iha ami nia matan” Dehan Xefe Kontributor Silvester Ferreira iha Salaun ESGP Suai.

Nia hatutan ema hotu hotu iha Covalima tenki kontinua aprende tanba ema hotu hotu mak na’in ba dezemvolvimentu iha Covalima.

“Labele Baruk atu aprende saída Mak imi sedauk aprende Koko atu aprende bebeik Tamba iha kovalima Ida nee ema hotu hotu Tenki nain ba Dezenvolvimentu” Nia haktenik.

Tempo ne’e, Administrador Munisipiu Covalima, apresia ba esforsu ne’ebé Ekipa Kontributor halo hodi realiza atividade iha ambitu komemora 20 Maiu ba Dala XX iha Covalima, hanesan Aktividade Asaun Karitativu, Limpeza Jeral, Kalan Animasaun, no Seminariu Eduaktivu ba Estudante Sekundaria no Universitariu iha Covalima ne’ebé realiza Kinta Feira ohin.

Apresia ba Ekipa Enisiador ba eventu ne’e hodi realiza atividade ne’ebé ohin ita bele halo iha eskola ida ne’e, hanesan horkalan bainhira imi aprezenta teatru iha Ladi, refleta ona imi nia atetude sira ne’ebé akontese durante ne’e, teatru ne’e simples maibe nia reflesaun ne’e dook tebes. Ita tenki hala’o bebeik maibe bebeik, klaru ke Juventude ne’e mak futuru ba Nasaun” Administrador Covalima, Francisco de Andrade enkoraja foinsa’e.

Seminariu Edukativu ba Estudante sira ne’e realiza iha Salaun Eskola Sekundaria Publiku Geral Suai, ne’ebé ofisialmente loke husi Administrador Munisipiu Covalima(AMC), Francisco de Andrade, Kinta Feira (19/05).

Jornalista : Joana Cardoso

Editor      : Chamot Nahac