Covalima (RCCT) 25-05-21, Saúde Municipio Covalima durante halo levantamentu ba dadus ba komunidade sira iha Suco no Aldeia sira iha Municipio Covalima, ho idade 60 ba leten inklui ema nebe maka ho kondisaun moras, tanamotuk ne’e Servisu Saude Covalima iha ona dadus haotuk ema nain 10.803 nebe mak atu Simu Vasina iha Covalima.
Kasu lia ba RCCT, Diretur Servisu Saúde Municipio Covalima, Filipe Perreira Lemos informa, dadus husi Posto Administrativo hitu nebe maka tama ona iha Servisu Saúde Municipio Covalima hamutuk ema na’in 10.803 nebe kompostu husi Ema ho idade 60 ba leten hamutuk 4.958 no ema nebe maka ho moras 5.845, nia hatutan dadus hirak ne’e preparadu ona atu halo pedidu ba Nasional, hodi fo Vasina tuir dadus nebe iha.
“ Dadus nebe maka agora dadauk iha Servisu Saúde Municipio Covalima maka, Ema idade 60 ba leten hamutuk, 4.958 kompostu husi Feto 2.676 no Mane 2.282 no ba ema nebe maka ho moras ne’e hamutuk 5845 kompostu husi Feto 2.906 no Mane 2.939 ida ne’e maka dadus Provisorio iha Servisu Saúde Municipio, hodi prepara halo pedidu Vasina ba sira, hodi nune’e ita bele fo Vasinasaun ba sira nebe maka tinan 60 ba leten no sira nebe maka ho moras ” Diretor Filipe dehan iha nia kna’ar fatin.
Diretur Filipe hatutan, Servisu Saúde Municipio Covalima sei kontinua foti dadus ba Funsionarios sira iha Municipio Covalima, tanba ne’e, sira nia parte informa ona ba Diretur Servisu Municipal sira, atu entrega dadus Funsionarios ba iha Servisu Saúde Municipio atu nune’e bele halo planu preparasaun ba pedidu Vasinasaun.
“ Ami prepara ona pedidu baseia ba dadus nebe maka iha, maibe ami sei hein tan loron ida ka rua, tanba iha orientasaun katak Funsionarios sira mos tenke simu hotu Vasinasaun, entaun presija ami foti dadus mos husi sira, tanba ne’e maka ami informa ona ba Diretur Servisu Municipais sira, atu entrega dadus mai ami, atu nune’e ita bele halo planu preparasaun ba pedidu Vasinasaun nian ” Diretor Filipe ne’e dehan.
Entertanto ba dadaun ne’e, Ekípa Saúde remata ona foti dadus ba ema idade 60 ba leten no ema nebe maka ho moras sira, atu simu Vasinasaun, maibe loron atu fo vasinasaun ba ema sira ne’e sidauk los, tanba ne’e Servisu Saúde Municipio Covalima sei kontinua rekolha dadus Funsionarios sira nian, husi Diretor Servisu Munisipal sira iha Municipio Covalima.
Jornalísta : Tynho Gusmão & Aje Ferreira
Edítor : Chamot Nahac
