Covalima (RCCT) 08-10-21, Ministerio Agrikultur no Peskas (MAP) Liu husi Diresaun Floresta Kafe no Plantas Industria iha Munisipio Covalima husu ba komunidade sira nebe mak hela besik iha tasi ibun la bele estraga Ai-Parapa nebe mak moris iha tasi ibun.
Xefe Delegasaun Floresta Kafe no Plantas Industria Munisipio Covalima Francisco Sarmento husu ba komunidade no lideransa komunitaria sira atu kuidadu Ai-Parapa iha tasi ibun no la bele estraga Arbiru.
“Ha’u hakarak fo informasaun ba Komunidade no lideransa Suco hanesan Xefe do Suco no Xefe Aldeia sira, tenke kuidadadu didi’ak ita nia Ai-Parapa nebe mak moris iha area Kostal, tanba Ai-Parapa ne’e na’in moris no mos balu ita ema mak kuda hodi asegura tasi ibun no kolan ninin” Dehan Xefe Delega Floresta Francisco Sarmento.
Xefe Delegasaun Floresta Munisipio Covalima hatutan Ai-Parapa ne’e espesialmente moris iha tasi ibun, tanba ne’e Governu bandu iha Timor laran la bele estraga arbiru Ai-Parapa nebe mak moris iha area kostal ka tasi ibun.
“ Ai-Parapa nia fatin atu Moris ne’e iha area Kostal ka Tasi ibun tanba ne’e husi Governu bandu iha Timor laran la bele estraga arbiru Ai-Parapa ne’e, inklui mos area floresta komunitario, benefisiu husi Ai-Parapa ne’e bo’ot tebes ba animal ka rikusoin tasi laran nian, hanesan Ikan, Boek, Kadiuk no Animal sira seluk bele subar a’an no fo tolun iha Ai-Parapa nia abut sira ne’e, no mos asegura ita nia area tasi ibun halo sai matak ” Hatutan Xefe Delega Floresta Francisco Sarmento.
Entretantu Xefe Delegasaun Floresta Kafe no Plantas Industria Munisipio Covalima Francisco Sarmento husu ba komunidade sira iha Munisipio Covalima laran atu la bele estgraga area Floresta nian iha area kostal ka tasi Ibun no Ai laran tuan sira hodi la bele hetan difikulta be mos, Erozaun ka rai halai iha loron ikus.
Jornalista : Saturnino Soares
Editor : Chamot Nahac
