Covalima (RCCT) 09-12-2, Sekretariu Estadu Formasaun Professional no Empregu (SEFOPE) atribui Sertifikadu ba Graduante Canossa Vokational Training Center (CVTC) Suai hamutuk 47 kompostu husi Administrasaun na’in 18, Ospitalidade 26 inklui Kursu Komplementar na’in tolu (3) ne’ebé remata ona kursu durante tinan ida.
Molok Atribui Sertifikadu, Diretór Jeral iha SEFOPE, Paulo Alves iha nia deskursu husu Graduante sira atu hatama proposta ba SEFOPE liu husi programa Auto Empregu hodi fo apoio ba Jnven sira ne’ebé maka iha talentu no kriatividade Inovativu.
” Agora ita bo’ot sira Gradua ona depois imi nia Sertifikadu ne’e sai lixu ga oinsa, tanba ne’e maka ami mos hakarak enkoraja alin Estudante sira karik iha inisiativa bele hatama proposta ba SEFOPE minimal ema nain lima, tanba ami iha programa ida naran formasaun Auto Empregu, ita fo apoio Jovem sira ne’ebe maka aprende ona iha Sentru formasaun, sira iha talentu no kriatividade atu hamosu sira nia negosiu hodi hakbi’it sira nia a’an atu nune’e bele fo servisu ba ema seluk ita reduz taxa dezempregu iha rai ida ne’e” Diretór Jeral Paulo Alves Informa iha Salaun SCAM Suai.
Iha Fatin ne’e Diretóra CVTC Suai Candida de Castro Perreira mos enkoraja Graduante sira atu kontinua esforsu maske hetan ona Sertifikadu, tanba ema ne’ebé susessu mak sira ne’ebé hetan ona servisu ruma.
” Ha’u hakarak dehan ba alin sira katak susessu ne’e la’os simu Sertifikadu ne’e, susessu ne’e ema ne’ebé maka hetan ona servisu hodi sustenta nia moris, sustenta sira nia an no sira Nia familia ida ne’e maka dehan susessu, tanba ne’e maka labele haksolok ho sertifikadu ne’e, ida ne’e sadik imi oinsa bele esforsu nafatin hodi hetan mahon ne’ebe di’ak ka susessu” Diretora CVTC Suai
Representante Inan Aman Rita Maria Soares agradese ba SEFOPE no CVTC Suai, tanba duránte tinan ida hanorin ona nia Oan konaba saida maka sira atu halo iha futuru oin mai.
” Ami agradese ba SEFOPE no CVTC Suai tanba hanorin ona ami nia oan sira konaba saida maka sira bele halo iha futuru oin mai para hadia sira nia Moris” Representante Inan Aman ne’e dehan.
Entretantu husi total Graduante hamutuk 47 ne’e, Estudante balun mai husi Municipio Seluk hanesan Ermera, Ainaro, Manufahi nsst, no serimónia graduasaun ba Dala XII ne’e, ba Estudante ba Ospitalidade simu Sertifikadu I ho II, Kursu Administrasaun Sertifikadu I no II inklui Kursu Komplementar.
Jornalísta : Tynho Gusmão
Editor : Chamot Nahac
