Covalima (RCCT) 28-12-21, Sekretariu Estadu Arte no Kultura (SEAK) liu husi Diretór Jeral Arte no Kultura Manuel Ximenes Simith rekomenda ba Autoridade Munisipiu atu oferese Salaun ( Gedung Wanita) Uma Feto Covalima ba Arte no Kultura, atu nune’e ba Futuru sai Sentru Kultural Munisipal.
Rekomendasaun ne’e hato’o bainhira realiza Kampaña Nasional ho tema Kultura Forte Nasaun Metin iha Salaun Uma Feto Covalima Tersa-Feira ohin (28/12).
“Aproveita iha oportunidade ida ne’e atu husu Fatin ne’e sai Sentru Kultural ba Munisipiu Covalima, ne’ebé ami sei halo proposta ne’ebé karik bele Fatin ne’e oferese ba Arte Kultural para iha Futuru bele sai Sentru ida” Diretór Jeral Rekomenda iha nia diskursu.
Relasiona ho rekomendasaun ne’e, Reprezentante Administrador Munisipiu Covalim Francisco Mendonsa “Tatamero” aseita ho rekomendasaun ne’e, maibe prezisa halo pedidu ba Administrasaun Munisipiu atu nune’e bele analiza.
” Fatin ida ne’e Edifisiu antigu hanaran “Gedung Wanita” atu sai fali Sentru Kultural iha Covalima, ida ne’e ami aseita, maibe tenki halo Karta ou pedidu ruma ba Administrador Munisipiu depois nia hare oinsa bele haruka ba iha Diretór Jeral Arte no Kultura” Tatamero dehan iha Salaun Gedung Wanita bainhira partisipa iha Kampaña ne’e.
Entretantu Salaun Uma Feto Covalima “Gedung Wanita” ne’e harii iha desde tempu Okupasaun Indonésia nian.
Jornalista : Tynho Gusmão
Editór : Chamot Nahac
