Covalima (RCCT) 28-12-21, Ministériu do Ensino Superior Siénsia e Kultura (MESSK) liu husi Sekretariadu Estadu Arte e Kultura (SEAK) realiza Kampaña Nasional iha Salaun Uma Feto Munisipiu Covalima ho tema “Kultura Forte Nasaun Metin” hodi konvida lia na’in sira iha Postu Administrativu hitu hodi halo diskusaun Konaba Kultura Munisipiu Covalima nian ne’ebé partisipa mos husi Membru Parlamentu Nasional Prezidenti Komisaun G Antonio Verdial.
Diretór Jeral Arte no Kultura Manuel Ximenes Smith iha nia diskursu hateten objetivu konvida Katuas Lian na’in sira ne’e, atu transmiti orijinalidade Covalima nian ba Jerasaun foun sira, atu Salvaguarda nafatin Kultura orijinal.
“Ita bolu ita nia katuas Lia Na’in sira ne’e para sira bele transmiti informasaun lolos konaba orijinalidade Covalima nian ba Jerasaun foun sira, atu nune’e manteim Salva Guarda ba ita nia Kultura orijinal ne’e” Nia dehan iha diskursu (28/12).
Membru Parlamentu Nasional Prezidenti Komisaun G Antonio Verdial agradese ba aktividades Kampaña Nasional Kultura nian, nia mos promesa sei apoio SEAK hodi tau matan ba Munisipiu Covalima.
“Hanesan distintu Deputado ne’ebé responsabiliza area Edukasaun Juventude Kultura no Sidadania ha’u sei suporta Sekretariu Estadu Arte no Kultura hodi tau matan ba rai Covalima” Membru Parlamentu ne’e informa.
Entretantu iha Kampaña Nasional ho tema Kultura Forte Nasaun Metin, no Lia Na’in sira iha Postu Administrativu hitu maka halo diskusaun konaba Kultura orijinal Covalima nian.
Jornalista : Tynho Gusmão
Editór : Chamot Nahac
