Covalima (RCCT) 02-12-21, Sentru Esperansa (SE) ho Rede Referal re-intrega Kliente Abuzu Sexual hasoru Minoridade ho inisial JMS ho nia oan ba nia Familia Iha Suco Maudemo Postu Administrativu (PA)Tilomar, ne’ebé duránte tinan ida resin iha hela iha SE.
Madre Santina de Oliveira SSPS agradese ba Familia tanba simu fali nia Kliente ho di’ak, nune’e Madre ne’e promesa iha Futuru sei apoio Nia Kliente area Edukasuan.
“Ami agradese ba Aman Maromak tanba liu husi nia grasa familia hotu iha ne’e simu ami ho di’ak, liu-liu ba oan ne’ebé hetan problema iha tinan kotuk liu ba, ohin simu ami ho di’ak tebes, ami sei la husik JMS ho nia oan ne’e, ami sei esforsu buka dalan para oinsa nia bele kontinua ninia eskola” Madre Santina dehan.
Nune’e Madre Santina husu ba Familia Kliente atu labele halo presaun hasoru JMS ho nia Oan.
“Ohin ami lori mai entrega iha ne’e, maibe ha’u husu ba familia sira labele halo presaun ba nia, ne’ebe ami sei la husik nia mesak, depois labele hanoin barak konaba oinsa ninia eskola, ami sei tau matan buka fatin ba nia” Madre Santina informa.
Iha fatin ne’e Familia Kliente ho matawen simu Kliente na’in rua ne’ebé duránte tinan ida resin hela iha Sentru Esperansa, tanba ne’e reprezentante Familia Kliente Isac da Silva agradese ba Sentru Esperansa no Rede Referal Covalima.
“Agradese tebes ba ita bo’ot sira, tanba durante tinan ida resin iha fatin ne’eba fila mai ha’u nia subrina no oan kondisaun ne’ebé normal,ne’ebé ida ne’e ami selu labele so maromak maka bele hare selu buat ne’ebé imi halo ba sira na’in rua, representa familia husu deit se bele apoiu mos parte ba edukasaun, nia bele kontinua nia eskola ka lae? tanba dalaruma ami mak lori ba atu eskola parte husi eskola ka ema ruma husu ami tun sae? Maibe husi Sentru Esperansa ba Feto hamutuk ho Rede referral liu husi karta ruma bele atende ho lalais,” Reprezentante Familia ne’e Informa iha Suco Maudemu.
Entretantu Kazu ne’e iha tinan kotuk liu ba, no Kliente JMS ho nia oan iha Sentru Esperansa duránte tinan ida resin, ho nune’e Kuarta-Feira horiseik (01/12) Sentru Esperansa hamutuk ho Rede Referal Covalima halo re-intrega hikas Kliente ba Familia sira.
Jornalista : Tynho Gusmão
Editór : Chamot Nahac
