Covalima (RCCT) 09-08-21, Ekípa Servisu Voluntáriu Rotaract Club of Covalima (ROOCOV) kontinua apoio aihan básiku ba Familia Vulnerável inklui Ema ho Difisiénsia hamutuk 16 iha Suku Beko Aldeia Gala Domingu horiseik (08/08).
Ba Jornalísta sira Presidente ROOCOV Julio Arlindo esplika, sasan nebe apoio, kada Familia hetan Fos kilo 10, Bimoli, Masi Midar kilo 1, inklui Sabaun ho Rinso nsst.
” Ami nia prinsipio ne’e ba Komunidade sira nebe ho kondisaun difisiente no Vulneravel presiza tebes, tanba ne’e ohin ami distribui ona iha Aldeia Gala ba Familia 16, kada Familia ne’e ami fo Fos Kilo 10, Bimoli, Masi Midar kilo 1, no Sabaun ho Rinso depois nsst” Julio dehan.
Julio informa, distribuisaun aihan básiku ne’e, Rotary Club of Dili Lafaek (Rocdlaf), hetan fundus husi Rotary District Governur iha Australia, hodi aloka ba Rotaract Club of Covalima ho montante dolar Amerikanu atus lima ($ 500.00).
” Ajuda ida ne’e hetan fundus husi Rotary Club of Dili Lafaek ( Rocdlaf), sira mos hetan fundus husi Rotary District Governur iha Australia hodi aloka mai iha Covalima ho montante dolar atus lima, ida ne’e ba etapa Segundu ninian” Julio esplika.
Iha fatin hanesan Benefisiáriu Artur Vicente sente kontente ho ajudus ne’e, tanba bele hakma’an ona situasaun nebe sira enfrenta.
” Ami Kontente, agradese tebes ba Ekipa nebe ohin fahe sasan mai ami, maske utoan maibe agradese tanba sira servisu ho Voluntariu, sira fo ami hodi responde netik ami nia situasaun” Artur expressa nia sentimento.
Entertanto molok distribui aihan ba Benefisiarius sira, Ekipa Rotaract Of Club Covalima tun direta hodi observa Komunidade nebe maka Vulneravel no Difisiensia presiza tebes atu hetan ajudus.
Jornalista : Tynho Gusmão
Editor : Chamot Nahac
