Covalima ( RCCT ) 12-10-21, Honorio Gusmão hanesan Reprezentante Organizasaun Raes Hadomi Timor Oan (RHTO) iha Munisipio Covalima hato’o agradesementu ba Sra Joana de Sa Araujo nebe hatutan husi ekipa Radio Comunidade Cova Taroaman (RCCT) fo Apoiu kadeira Roda ba Santiago Gonsalves nebe moris kondisaun difisiensia Ain mak hela iha Aldeia Baer Suco, BeiSeuk Posto Administrativo Tilomar.
Notisia relevante :https://www.rcct.tl/loron-kalan-hakdasak-iha-rai-francisco-husu-apoio-kadeira-roda-ba-santiago/
Konfesa ba Jornalista RCCT Saturnino Soares, Coordenador RHTO, Honorio Gusmão hato’o agradese ba Joana de Sa Araujo nebe ho Fuan Bo’ot Apoiu ona Kadeira Roda ba nia maluk Santiago nebe hela iha Aldeia Baer.
“ Ha’u em Nome RHTO Munisipio Covalima, hakarak hato’o ami nia agradese Mana Joana nebe mak apoiu ona Kadeira Roda ba ami nia maluk difisiente nebe durante ne’e seidauk hetan apoiu ruma husi ita nia Governu no parte seluk nebe mak seidauk ajuda ami nia maluk difisiente ,maske oras ne’e dadaun ami nia parte seidauk to’o iha maluk difisiente nia fatin maibe mana Joana Ajuda uluk ona ami nia maluk difisiente nia presiza” Cordenador RHTO Munisipio Covalima Honorio Gusmão Espresa.
Notisia Relevante :https://www.rcct.tl/tinan-sanuluh-resin-hakdasak-iha-rai-joana-lori-hamnasa-ba-santiago/
Honorio mos hato’o Obrigadu ba Ekipa Jornalista Radio Comunidade Cova Taroman tanba liu husi Publikasaun Radio Comunidade Cova Taroman bele hato’o ona difikuldade nebe ema difisiente sira hasoru iha Munisipio Covalima.
“ Obrigadu barak mos ba Radio Comunidade Cova Taroman, tanba liu husi Radio Comunidade Cova Taroman nia kanal bele hato’o ona informasaun kona ba ema ho difisiente nia difikuldade tomak iha Covalima, liu husi kanal radio ida ne’e mak loke ema nia matan no hare ema ho difisiente sira nia susar no ohin loron ita nia maluk sira mos ho ajuda privadu ba ita nia maluk difisiente sira nia presiza ” Tenik Cordenador RHTO Munisipio Covalima Honorio Gusmão.
Entretantu Cordenador RHTO Honorio Gusmão mos husu ba Governu no Organizasaun Naun Governamental sira atu fo apoiu ruma ba maluk difisiensia sira iha Covalima tanba ema ho difisiente susar tebes atu hetan buat ruma kompara ho ema nebe mak kondisaun normal.
Jornalista : Saturnino Soares
Editor : Chamot Nahac
