Rekoñese Hetan Kritika-Autoridade Covalima Loke BG Anima Feira 28 Novembru

Covalima (RCCT) 22-11-22–Hahu Segunda horsehik (21/11) Autoridade Munisipal Covalima loke feira kuliner no jogu Bola Guling (BG), iha kampu futeboll ladi hodi komemora loron proklamasaun independensia Timor Leste ba dala 47.

Autoridade Covalima rekoñese banhira loke feira iha  kalan ne’e mos loke atividade bola guling fo impaktu negativu, no hetan kritika, maibe bazea ba esperensia iha tinan 2018 loke feira foku deit ba fa’an sasan, ema sei la partisipa.

 “Los duni ema barak halo kritika konaba ita nia maluk sira loke bola guling sira hatete atividade ida ne’e negativu ba publiku, bazea ba esperensia iha tinan 2018 loke feira kuliner de’it, ita la loke bola guling ema mai ladun barak, tuir ha’u nia observasaun la loke bola guling ema la mai hodi gasta sira nia osan” Reprezentante Administrador Munisipiu Covalima, Francisco de Jesus Alves, halore lia ne’e iha ninia deskursu  ba abertura feira nia bazar kalan iha kampu ladi, Segunda (21/11).

Tanba bazea ba esperensia ne’ebé hatudu loke atividade feira kuliner tenki loke mos atividade bola guling nune’e komunidade sira mos partisipa masimu.

“Loke Atividade bola guling sira la’os loke deit maibe selu taxa ba governu, hodi bele halo dezenvolvimentu, tanba foin lalais ha’u hasoru inspetor trabalu jogu informa Covalima kontribui taxa maka’as liu husi atividade jogu, tanba loke atividade jogu ema la obriga ita atu joga” nia hateten.

Nune’e ambito komemorasaun Loron Proklamasaun Independensia, 28 Novembru ba dala 47 iha Covalima, komisaun organizadora loke feira kuliner ba grupu feto sira hodi tein produtu lokal  nune’e komundade balun bele sosa hodi fo rendimentu ba grupu feto sira, alende ne’e Autoridade sira iha Munisipiu mos liu husi Komisaun Oganizadora loke meje Bola Guling (BG).

“Ita iha atividade lubuk ida husi komemora 28 Novembru primeiru ita loke feira mak ita hamutuk iha ne’e tanba ne’e ita mai hamutuk iha ne’e hodi halo abertura ba feira hanesan ita nia inan sira halo atividade tein hahan produtu lokal no loke atividade bola guling” Reprezentante Administrador Munisipiu Covalima, Francisco de Jesus Alves, informa.

Iha ambito komemora 28 Novembru hodi realiza atividade bila guling la’os loke de’it maibe sira mos selu taxa ba estadu tanba foin lalais inspetor traballu do jogo informa katak Covalima kontribui taxa maka’as liu-husi atividade jogu.

Jornalista : Moises Madeira

Editor       : Chamot Nahac