Covalima (RCCT) 22-07-21 Tuir Orentasaun husi Ministerio Edukasaun Joventude no Desportu (MEJD), Professor no Estudante sira tenke simu Vasina Covid-19 molok atu reativa Aula prezensial iha Eskola hotu iha territorio Nasional, tanba ne’e Ekipa Saude iha Municipio Covalima Kinta Feira ohin hahu halo Vasina ba Estudante no Professor iha Eskola Sekundaria Geral Publiku (ESGP) Suai.
Kasu Lis ba Jornalista RCCT Mediku Elvira da Corsilho hateten, Vasina nebe fo ba Estudante sira ne’e vasina Sinovac, nia hatutan vasina ne’e fo deit ba Estudante nebe maka ho idade 18 ba leten.
” Vasina nebe maka ami fo Estudante sira ne vasina Sinovac, maibe ami sona deit Estudante nebe ho idade 18 ba leten,depois ami sei hare sira nia kondisaun molok atu Sona “ Elvira da Corsilho dehan.
Mediku ne’e Informa, Dadaun ne’e Ekipa Saude fo ona Vasinasaun ba Eskola Sekundaria Katolika Ave Maria Suai (ESKAM) molok halo Vasina ba Estudante no Profesores sira iha ESGP, nia promesa sei kobre Eskola Sekundario sira nebe existe iha Municipio Covalima.
” Ami fo ona vasina ba Sira iha ESKAM depois Agora ami mai iha ne’e, depois ami nia Ekipa mos ba tiha ona Eskola Teknika Akar-Laran, maibe ami sei kobre hotu Eskola Sekundario sira iha Covalima hodi fo vasina ba Sira” Mediku informa
Diretor ESGP Suai Francelino Freitas Carvalho hateten, numeru Estudante ESGP Suai ho idade 18 ba leten nebe atu Simu vasina, metade husi total Estudante 2175.
” Numeru Estudante nebe atu simu vasina ne’e ita bele dehan metade husi total Estudante 2175, tanba Estudante klasse 10 ano maka la hetan Vasinasaun tanba sira nia idade ne’e maioria la to’o 18, nebe klasse 11 ano ho 12 ano inklui Professor sira maka tenke simu” Francelino dehan.
Entertanto Diretor ESGP Suai ne’e husu ba Professor no Estudante sira nebe maka atinji ona idade 18 ba leten atu hakbesik ESGP Suai hodi Simu Vasinasaun.
Jornalista : Tynho Gusmao
Editor : Chamot Nahac
