Covalima (RCCT) 09-08-21 Durante Tinan ida resin Funsionárius Professional Saúde nebe hala’o servisu iha Postu Saúde Gala, la ativu iha servisu fatin, hodi fo impaktu ba Populasaun 395 iha Aldeia Gala, bainhira hetan moras todan ruma, obrigatóriu tenke ba konsulta iha Postu Saúde Suku Beco nebe dok mais ou menus kilometru Sanulu (10) husi Komunidade sira nia hela fatin.
Tanba ne’e Xefe Aldeia Gala Armando Barreto sente triste, tanba Funsionárius Professional Saúde ne’e lakoi hela iha fatin ne’e tanba Aldeia refere seidauk asessu ba Eletrisidade, ho nune’e nia husu Servisu Saúde Municipio Covalima atu hare problema ne’e, atu nune’e bele salva Komunidade nia vida bainhira hetan moras todan ruma.
“Postu Saúde ne’e hari fofoun sira mai bebeik, maibe durante tinan ida resin to’o agora ne’e sira la mai ona, ida ne’e fo impaktu baa mi, ne’ebe dalaruma ami nia ema ne’e mate deit tamba sira la tama servisu, ne’ebe husu ba Diretor Saúde Covalima tenke hadia kedas para sira bele ativu, lae ne’e ami maka susar bebeik ” Sefe Aldeia Gala informa iha Loron Domingu ne’e (08-07).
Tuir informasaun nebe RCCT Asesu husi Xefe Aldeia Gala asessu katak, Funsionárius Saúde nebe la ativu hodi Halo ninia K’nar iha Postu Saúde Gala tanba Aldeia Gala seidauk asseu ba eletrisidade no la iha linha internet.
“ Tuir imformasaun nebe mak ha’u rona husi saúde balun katak, ami nia Aldeia Gala seidauk asesu ba elektrisidade no laiha linha internet, tanba ne’e mak sira enfermeira no Doutor sira lakoi mai servisu iha ne’e,” Sefe Aldeia Gala informa.
Iha sorin seluk Representante Komunidade Joana Moniz Soares husu ba parte relevantes atu tau Pessoal Saúde permanente iha Postu Saúde Gala hodi atende Inan Isin rua Sira.
” Ami nia hakarak ne’e Doutor ou Parteira ida tenke tau permanente iha Postu Saúde Gala ne’e, atu nune’e bele atende ami ho di’ak, tanba ami ba konsulta iha Beco ne’e dok los, dala barak ami kondisaun isin rua atu partus ne’e araska, dala ruma mos ami hodi kondisaun todan ne’e obriga an ba la’o ain ho oras rua ba postu saúde Beco Villa, ne’e mak ami husu para tau Doutor ho Parteira depois Enfermeira ne’e tenke permanente iha ne’e ” Joana Moniz informa.
Diretor Servisu Saúde Municipio Covalima Filipe Pereira Lemos informa ba RCCT Via Telefone katak Nia Parteseidauk bele fo komentáriu kona ba kestaun ne’e tanba halo sei konfirma uluk ho Xefe Sentru Saúde Postu Suai hodi buka tuir Pessoal Saúde nebe maka la ativu iha Postu Saúde Gala durante ne’e
“ Hau hanoin ha’u seidauk bele fo komentáriu, nebe ha’u sei konfirma lai Xefe Sentru Saúde Postu Suai nian hodi husu ema ne’e ba nebe maka la tama, depois ema ne’e durante ne’e halo saida ” Diretor ne’e dehan liu husi via telefone.
Jornalista : Tynho Gusmão
Editor : Chamot Nahac
