Covalima (RCCT) 23-12-2,1 PNTL Covalima kompostu husi Batalhão Ordem Públiku (BOP) Unidade Polisia Fronteira (UPF) Unidade Polisia Marítima (UPM) hamutuk ho F-FDTL halo formatura iha Komandu Geral PNTL Munisipiu Covalima prepara seguransa ba Festa Natal 2021 no Tinan foun 2022.
Segundu Komandante PNTL Munisipiu Covalima, Asistente Super-Intendende Polisia, Albino Mauzinho do Rego hateten Komandu Geral fo ona orientasaun ba Komandu Munisipiu sira iha teritóriu Nasional, atu hare situasaun jeral ba festa natal ho tinan foun, liu-liu atu kontrola prejépiu sira ne’ebé besik iha dalan públiku.
“Tuir orentasaun Komandu Geral nian mai iha Komandu hotu-hotu, liu-liu Munisipiu Covalima hodi hare situasaun Jeral durante periodu festa natal no tinan foun ne’ebé maka sei mai, depois hare mos ita nia alin juven sira ne’ebé maka halo prejépiu iha dalan ninin mínimu tenke metro lima nulu (50m) dok husi Estrada públiku” Mauzinho dehan iha nia diskursu iha Komandu PNTL Covalima.
Segundu Komandante ne’e informa, Membru PNTL ho F-FDTL sei halo Show Force hale’u Kapital Munisipiu hodi halo sensibilizasaun ba Jovem sira konaba regrasa hirak ne’ebé Estadu fo sai ona, relasiona ho Loron Natal no Tinan foun nian.
“ Depois ita sei halo movimentasaun ba iha Mota-Masin liu husi Kasabauk, sei iha tempu karik sei ba mos Lalawa, atu nune’e ita dezamina informasaun ba ita nia Juven sira, Komunidade tomak iha Covalima katak ami garantia seguransa ba ita bo’ot sira maibe regras empedimentu Estdau fo mai maka ne’e, katak halo prezépiu karik tenki 50m ba kotuk, depois labele hemu tua ho karaoke iha prezépiu” Mauzinho informa.
Entretantu Segundu Komandante ne’e husu ba membru PNTL no F-FDTL atu hasa’e profesionalismu parte seguransa nian, atu nune’e bainhira simu loron natal no tinan foun bele garantia komunidade sira moris ho seguru, dame paz no estabilidade.
Jornalísta : Tynho Gusmão
Editór : Chamot Nahac
