Mota Baer Nakonu-Komunidade Lubuk Ida Haris Udan Iha Horun Leten

Komunidade Sira nebe halo Viazen Husi Suai ba Postu Fohorem Hein Hela Mota Baer ne’ebe tun no Suli maka’as halo kareta no motor labele hakat liu ba mai.

Covalima (RCCT) 23-12-21 Mota Baer ne’ebé lokaliza iha Suco Beiseuk, Aldeia Baer Postu Administrativu Tilomar, iha tempu udan ameasa no difikulta Ema no transporte públiku sira atu halo movimentu husi diresaun Kapitál Munisipiu Covalima ba Postu Administrativu Fohorem.

Hanesan iha Kuinta Feira ohin (23/12) wainhira fila husi Kapital Munisipiu Covalima Komunidade sira obrigadu tenki sei an iha udan hodi hein Be Mota Menus mak foin bele hakat liu mota baer hodi kontinua viazen ba Pontu Administrativu Fohorem,

Komunidade Suco Datorua Emilda Mendonça informa kada tinan iha tempo udan mota baer sempre difikulta sira nia viazen.

Mota ida ne’e tinan barak ona hansan ne’e bebeik, tempu udan ami liu la di’ak, dalaruma ami hein to’o kalan maka foin ba liu uma, kuandu bebeik entaun ami hein to’o dader dalaruma ami fila fali ba suai” Emilda dehan iha Mota Baer bainhira hein mota ne’ebe bo’ot (23/12)

Enkuantu, Xefe Suco Datorua Eduardo Suri, ne’ebé Mota Baer Impede mos Nia Viazen fila Husi Suai ba ba ninia hela fatin iha Suco Datorua, hare situasaun ne’e, husu ba Governu liu-liu Ministériu Obras Públika (MOP) atu tau matan kondisaun estrada ne’ebé at inklui mota ne’ebé difikulta movimentu transporte bainhira tempu udan.

“Ha’u husu nai ulun sira ne’ebé ukun hela, favor bo’ot ida tau matan netik ba mota ida ne’e hodi halo ponte netik para ami liu, depois la’os mota ne’e deit, estrada mos at dalaruma ita ho transporte lao’ ne’e difisil los, agora dadauk ita bo’ot sira hare ami hein deit iha udan laran” Eduardo Suri informa iha Mota Baer, Suco Beiseiuk, Aldeia Baer, Postu Administrativu Tilomar (23/12)

Entretantu relasiona atu simu loron Natal ho Tinan Foun populasaun barak husi Kapital fila ba k’nua moris fatin, tanba ne’e observasaun Jornalista iha terrenu hatudu, komunidade sira barak maka habai an iha udan laran hodi hein mota ne’ebé sei sulin maka’as.

Jornalista : Tynho Gusmão

Editór      : Chamot Nahac