Covalima (RCCT) 15-12-21, Husi Fulan Janeiru to’o Novembru tinan ne’e Ospital Referal Suai (HRS) “Sigla Portuguesa” rejista númeru moras ISPA hamutuk 266, Gastritis 204, Estomagu inklui Hiper-Tensaun 150, tanba ne’e moras ISPA mantein Pozisaun ho númeru as iha Covalima.
Diretór Ospital Referal Suai José Moniz Ferreira informa, husi númeru ne’ebé rejista, ema na’in 1135 maka halo tramentu iha Ospital Suai, maibe na’in 22 la konsege salva sira nia vida no seluk rekuperadu.
” Husi Janeiru to’o Novembru ne’e, ami rejista moras ISPA maka as ho númeru 266, Hiper-Tensaun 150, Gastritis 204, depois ema na’in 1135 maka konsulta no na’in 22 maka mate no seluk rekopera, maibe ida ne’e ema bo’ot ne’ebé konsulta no mate iha ne’e” José dehan iha Sala Maternidade HRS.
Diretór ne’e klarifika, iha dadus ne’ebé rejista labarik sira mos mantein númeru as ho moras ISPA hamotuk ema na’in 464, Gastritis 102 no Febersindron 64, inklui moras tuberkuloze ho HIV, husi total númeru ne’e labarik 769 maka konsulta iha Ospital refere, maibe na’in 2 maka mate seluk rekuperadu.
“Labarik ne’ebe mai konsulta ne’e hamutuk 769, depois moras a’as ba labarik sira mos nafatin ISPA ho númeru 464, Gastritis 102, Febersindron 64, ho tuberkuloze ho HIV, maibe mate nain rua deit” José klarifika.
Entretantu Relasiona ho moras ne’ebé Ospital Referal Suai rejista, Diretór José Moniz Ferreira husu ba Populasaun sira iha Munisipiu Covalima atu hamos Ambiente ne’ebé foer nune’e moris iha ambiente ne’ebé mak mos hodi prevene moras sira ne’e.
Jornalista : Tynho Gusmão
Editór : Chamot Nahac
