Covalima (RCCT) 15-11-21, Ministériu Interior (MI) liu husi Gabinete de Planeamentu Estratejiku e Assesoria (GPEA) halo Desiminasaun Dekretu Lei NU.47/2020, 7 Outubru No Diploma Ministerial NU. 53 /2021, 21 Jullu ba Diresaun ha’at (4) iha Covalima.
Diretor Gabinete Planeamentu Estratejiku e Assesoria (GPEA) Francisco Soares hateten, Objetivu husi Desiminasaun ne’e oinsa Diresaun sira iha Munisipiu bele hala’o servisu tuir papel no responsabilidade ne’ebe assumi.
” Objetivu Desiminasaun ba Lei rua ne’e atu fahe informasaun ba sira konaba servisu saida maka Governu atribui ba Ministériu Interior ho nia estrutura hotu, tanba ne’e maka Lei rua ne’e hanesan giaun ida ba sira oinsa Diresaun sira halo servisu tuir papel no responsabilidade ne’ebe iha no labele halo servisu fora husi regras sira” Diretor Fracisco dehan iha nia intervista ba Jornalísta sira.
Enkuantu durante ne’e Ministériu Interior liu husi Gabinete Planeamentu Estratejiku e Assesoria (GPEA) seidauk identifika Diresaun sira ne’ebe la servisu tuir regras, tanba GPEA seidauk iha peskiza ruma konaba asuntu ne’e.
” Ita tenke liu husi estudu ruma maka hodi hatene sira la’o tuir regras ka lae?, maibe Diresaun sira tenke hatene sira nia papel no responsabilidade, karik halo servisu kontra fali regras entaun ne’e iha sansaun, karik mal deteta ruma entaun dalan legal tenke prosessu” Francisco Subliña
Sefe Departamentu DNSPP Munisipiu Covalima Julio Alves Amaral informa, liu husi formasaun ne’e bele hasa’e sira nia koñesimentu oinsa hala’o servisu tuir Lei ne’ebe iha.
” Formasaun ne’e importante ba ami atu hatene di’ak liu tan oinsa hala’o servisu tuir Lei ka regras ne’ebe maka iha, maibe ami durante hala’o servisu apoio familia vitima dezastre naturais ne’ebe maka ami identifika” Julio dehan iha intervista.
Entertantu formasaun ne’e durante loron rua ne’ebe hahu ohin (15/11), ne’ebe realiza iha Salaun Eskola Sekundaria Geral Públika (ESGP) Suai, no Partisipantes husi Diresaun ha’at (4) maka hanesan Protesaun Sivil, Bombeiros, DNSPP, Direaun Nasional Protesaun Konflitu Komunitariu (DNPKK)
Jornalísta : Tynho Gusmão
Editor : Chamot Nahac
