MEJD-Eskola 16 iha Covalima prioridade ba Konstrusaun no Reabilitasaun

Covalima (RCCT) 01-09-21 Tuir lista nebe Servisu Munisipal Edukasaun Munisipiu Covalima haruka ba Ministériu Edukasaun, iha Eskola 16 iha Covalima maka atu halo Konstrusaun no reabilitasaun, nune’e Kuarta-Feira ohin Diretora Jeral Planu Politika Inklusaun no Impresaun halo dezaminasaun mata dalan ba projetu Infrastrutura Edukativa, no projetu ne’e tama iha kategoria Fundus Transferensia Publika (FTP).

Ba Jornalísta sira Diretor Jeral Planu Politika Inklusaun no Impresaun Odilia Ung Martins hateten, sei aloka orsamentu ba Eskola nebe tama iha lista prioridade, no orsamentu ne’e Eskola maka sei jere rasik hodi halo konstrusaun no reabilitasaun.

” Ohin ami halo dezaminasaun ba mata dalan projetu Infrastrutura edukativa, no projetu ne’e tama iha kategoria Fundus Transferensia Publika, nebe orsamentu sei aloka ba Eskola sira nebe tama iha lista prioridade atu halo Konstrusaun no mos reabilitasaun ba tinan ida ne’e sira maka sei jere orsamentu ne’e, tuir lista nebe husi Munisipiu ba Ministériu Edukasaun katak Eskola 16 maka presiza atu halo Konstrusaun no mos reabilitasaun, nebe ami nia Ekipa verifikasaun mos hare katak prezisa tau matan ba Eskola hirak ne’e “ Diretora Geral ne’e dehan.

Nia esplika, prosessu implementasaun ne’e kada Eskola sei hari estrutura, nebe sei envolve mos Komunidade sira hafoin bele hetan aprovasaun husi Edukasaun Munisipiu Covalima, no ekipa tekniku sei observa bainhira implementa projetu ne’e.

” Prosessu implementasaun katak Eskola sira maka sei hari sira nia estrutura, tenke envolve mos komunidade sira, maibe la bele hare ba familiarismu, tamba Nene mai husi Komunidade, nebe ami nia ekipa tekniku sei observa lalaok sira ne’e “ Diretora Geral hatutan.

Maske nune’e Diretora Odilia la fo sai kuantidade orsamentu ba Konstrusaun no reabilitasaun Eskola 16 iha Munisipiu Covalima, ho rajaun Diretora Geral ladun hatene di’ak kuantidade orsamentu tamba aloka orsamentu ba kada Eskola ne’e la hanesan, tamba Eskola balun aumenta sala de aula, biblioteka, sentina,inklui kaza de banho no laboratorium.

” Nia alokasaun orsamentu diferente ba kada Eskola, tamba ne’e maka ha’u ladun fiksa ninia kuantidade ou totak orsamentu ba 16 projetus, tamba Eskola balun halo Konstrusaun aumenta sala de aula rua, depois Casa de banho, toilet, biblioteka nsst, nebe Hau ladun fiksa ninia total orsamentu ne’e “ Nia dehan.

Entretantu dezaminasaun mata dalan ba projetu infrastrutua edukativa ba Diretor no Kordenador Eskola 16 ne’e hala’o iha Salaun Edukasaun Munisipiu Covalima.

Jornalísta : Tynho Gusmao
Editor       : Chamot Nahac