Covalima RCCT (19-06-21) Edukasaun sai hanesan fontes ida nebe importante tebes ba ema nia moris no edukasaun sai mos baze fundamental ida atu transforma ema nia moris tanba ne’e partisipasaun inan aman iha prosesu edukasaun ba oan sira nia importante tebes dehan Ministro Edukasaun Juventude no Desportu (MEJD) Armindo Maia.
MEJD Armindo Maia dehan lia ne’e iha nia diskursu bainhira halo serimonia lansamentu Website Eskola Sekundaria Geral Publiku de Suai nian nebe realiza iha Sabado (19-06). Ministru Armindo Maia mos dehan Edukasaun la’os Governu nian deit, maibe responsabilidade husi parte hotu-hotu inklui inan aman.
Tanba ne’e Ministru Armindo Maia mos apresia ho kontribuisaun inan aman ninian ho kria website ba eskola ne’e.
”Partisipasaun komunidade, partisipasaun inan aman importante tebe-tebes tanba edukasaun ne’e responsabilidade ita hotu-hotu nian, edukasaun la’os responsabilidade governu nian deit ministeriu nian deit, maibe resonsabilidade ita hotu-hotu nian, responsabilidade eskola, responsabilidade inan aman tanba ne’e hakarak fo parabens ba inan aman maske susar maibe kontribui ba eskola ida ne’e ba oin” dehan Ministru MEJD Armindo Maia
Ministru Edukasaun Juventude no Desportu fundamenta, eskola bele di’ak, fasilidades bele kompletu no iha internet maibe eskola laiha jestaun nebe di’ak entaun ne’e sei marka pasu deit iha fatin. Maibe MEJD mos konsidera Diretur ESGP Suai Atual hanesna Jestor ida nebe di’ak ba Eskola refere.
”Hanesan ha’u hatete ona iha fatin bar-barak iha eskola bara-barak ita bele iha fasilidade hotu hotu bele iha uma di’ak fasilidades kompletu inklui internet, maibe kuandu eskola laiha jestaun nebe di’ak entaun ne’e ita marka pasu deit, jestaun eskola tenke di’ak no ha’u hare iha ne’e diretor eskola hanesan jestor nebe di’ak tebes atu lori eskola ne’e ba oin” Tenik Ministru MEJD Armindo Maia
tanba ne’e Ministru Edukasuan Armindo Maia dezafia estudante iha eskola sekundaria geral publiku de Suai atu fo prestasaun nebe di’ak iha eskola, tanba tinan-tinan maioria eskola privada maka hetan valor di’ak iha ezame nasional
”Ita fasilidade iha hotu ona, internet, livru mestre iha hotu, maibe ha’u hakarak dezafia eskola ida ne’e atu fo tan pasu ida ba oin bele hatudu katak imi nia alunos sira hatudu nia prestasaun, ida ne’e mak sei lori tempu, ita hatene katak tinan-tinan iha ezame Nasional ita sempre hili alunos husi primeiru klasifikasaun to’o desimu klasifikasaun, tinan-tinan alunos nebe hetan klasifikasaun ne’e maioria husi eskola privada, tanba ne’e nudar Ministru Edukasaun ha’u senti katak ida ne’e hatudu katak eskola publika barak presiza hadia’ buat barak” hateten Ministru MEJD Armindo Maia
Entretantu Ministru Edukasaun Juventude no Desportu iha ona orsamentu ba planu ba tinan 2021 hodi halo tan sala tolu no toilet ida iha ESGP Suai.
Jornalista : Estudantil Rony no Ade Gorete” RCCT”
Editor : Chamot Nahac
