MC Duni Jornalista-TLPU ” Organiza Eventu Intrese Povu Tau konsiderasaun Servisu Jornalistiku”-KO husu Diskulpa

Covalima (RCCT) 21-05-22—Prezidenti Komisaun Organizadora (KO) ba Komemorasaun Loron Restaurasaun Independensia Timor Leste ba Dala XX, Hanesan mos Sekretariu Munisipiu Covalima, Francisco de Jesus Alves husu diskulpa ba Jornalista sira relasiona Master of Ceremony (MC) duni sai Jornalista sira husi Kampu laran bainhira foti hela imazen ba nesesidade servisu kobertura Notisia konaba komemorasaun 20 Maiu iha Covalima Sexta Feira (20/05).

MC duni sai Jornalista iha Kampu ladi ne’e (20/05), bainhira Sekretáriu Estadu Meiu Ambiente Deometro Carvalho Amaral sai hanesan inpspetor da Serimonia Hasa’e Bandeira, komemorasaun Loron Restauarasaun Independensia Timor Leste ba Dala XX hodi halo pasa revista ba formatura.

Depois akontesimentu ne’e Prezidenti Komisaun Organizadora rekoñese MC JdaC duni sai jornalista bainhira jornalista hasai imajen no video iha kampu, uja Mic hodi hakilar dala rua ho lia fuan (Media Retira husi Kampu) mak Sekretariu Munisipiu Covalima rekoñese KO la prepara fatin ka fo espasu ba Media sira nia Jornalista ho nune’e mak Akontese Erru ne’e.

Normalmente iha Serimonia sira hanesan ne’e normalmente iha fatin ne’ebé dignu hodi halo filmazen ka fotografia, maibe balu la’os Jornalista mos tama hotu uza telemovel no halo barullu iha laran tanba ne’e protokolu orenta hodi retira iha fatin ne’e maibe media sira nia papel ne’e importante tebes tanba ne’e husi Komisaun Organizadora hakarak husu diskulpa ba ita bo’ot sira tanba ami la konsege prepara fatin propriu ba ita bo’ot sira” dehan Prezidenti Komisaun Organizadora Francisco de Jesus Alves Esklarese iha Kampu Ladi Sexta Feira horsehik (20/05).

Nia hatutan erru ne’ebé akontese hanesan esprierensia ida ba Komisaun Organizadora tanba ne’e tempu tuir mai sei prepara fatin Propriu ba Jornalista sira hodi labele akontese erru ba dala rua.

Ho akontesementu ne’e ha’u hanoin ne’e hanesan esprierensia ida tanba ne’e ba oin Komisaun Organizadora sei halo mos fatin Propriu ida ba Jornalista sira no sei la akontese tan ba dala rua ” nia hatutan

Maske Prezidenti Komisaun Organizadora rekoñese papel Jornalista importante maibe Realidade hatudu iha terenu, iha Serimonia Komemorasaun Independensia ba Dala XX MC duni sai Jornalista .

Jornalista sira mos hola parte importante tebes iha serimonia sira hanesan ne’e tamba sira mak bele hatutan informasaun ba ita nia komunidade sira iha ne’e no balu ne’ebé la konsege mai iha nee tanba ne’e sira bele fahe informasaun liu husi media” nia hakotu.

Hafoin Akontese Erru ne’e iha loron 20 Fulan Maiu, ohin Sabadu (21/05), Sekretariu Jeral-Timor Leste Press Uniaun (TLPU) Jejito da Silva, Ko’alia ba RCCT Via Telefone hodi Apela ba entidade hotu, bainhira organiza eventu ruma ho interese povu nian tenki tau atensaun ba servisu Jornalistiku nian liu husi Konvida Jornalista no esplika lala’ok Serimonia ka atividade ba Jornalista (bele briefing ou esplika liu husi karta konvite), nune’e mos prepara fatin ne’ebé mak pelumenus Jornalista sira bele foti imajen, video no sound/lian ne’ebé mak di’ak. Informa Sekretariu jeral TLPU ba RCCT Via Telefone Sabado (21/05).

Ho Erru ne’ebé akontese Sekretariu Jeral Timor Leste Press Uniaun (TLPU) Jejito da Silva hateten Jornalista iha liberdade atu asesu atividade ho karater interese publiku hodi responde direitu publiku konaba asesu informasaun, tuir artigu 41.° Konstituisaun RDTL.

Reporter : Jhana Cardoso

Editor    : Chamot Nahac