MAP Realiza Enkontru Anual ho Extensionista Sira Iha Covalima

Covalima(RCCT)04-08-22—Ministeriu Agrikultur no Peska (MAP) liu husi diresaun Nasional Extensaun Agrikola hala’o enkontru anual tinan 2022 hodi ko’alia konaba progresu servisu no Dezafius ne’ebé extensionista sira hasoru iha terenu durante hala’o k’nar.

Ba Jornalista RCCT ba diretór Jeral Prestasaun Dezenvolvimentu Institutu, Cejario Jose da Cruz hateten enkontru ne’e hanesan programa ida ne’ebé Diresaun Nasional Extensaun Agrikola liu husi Departamentu Informasaun hala’o hodi halo avaliasaun kada tinan atu hatene progresu servisu extensionista sira nian.

Programa ida ne’e, Diresaun Nasional Extensaun Agrikola ho Departamentu Informasaun halo avaliasaun Extensaun Agrikola tinan tinan, avaliasaun ne’ebé ita hala’o iha Munisipiu Covalima ne’e atu hatene progresu lolos husi Extensaun Agrikola ne’e to’o ona iha ne’ebé no sira nia servisu ne’e halo nusa” Dehan Diretór Jeral Prestasaun Dezenvolvimentu Institutu, Cejario Jose da Cruz, informa, Quarta Feira (03/08) ne’e iha Salaun enkontru Sentru Manutensaun Sanfuk, Suku Kamenasa, Postu Administrativu Suai, Munisipiu Covalima.

Nia hatutan iha enkontru ne’e mos Extensionista sira hato’o preokupasaun ne’ebé infrenta iha terrenu durante liu konaba Transporte no Osan Operasional.

Ita ohin rona preokupasaun barak, motor ne’ebé mak governu hasai lei katak halo lelaun tanba ne’e mak sira preokupa ituan atu desloka oinsa, no balu mos preokupa ho orsamentu operasional maibe iha Covalima, hodi ajuda Extensionista sira hodi hato’o nafatin informasaun konaba extensaun agrikultura liu liu pratika agrikultura nian” Hatutan diretór jeral Prestasaun Dezenvolvimentu Institutu, Cejario Jose da Cruz iha Salaun encontru sentru manutensaun Sanfuk Quata Feira ne’e.

Iha sorin seluk Diretór Servisu Agrikultur Munisipiu Covalima, Domingos Gusmão husu ba Extensionista sira atu halo reflesaun ba ida idak nia an hodi servisu di’ak liu tan.

Liu husi enkontru ida ne’e husu ba Extensionista ida no ami hotu ida idak atu halo reflesaun ba ida idak nia an no mos funsionamentu extensaun agrikola iha Munisipiu Covalima, katak ita hotu hotu hare ba ita ida idak nia an saida mak ita halo durante tinan ida nia laran no servisu saida mak ha’u sedauk halo no atinji atu nune’e ba oin ne’e ita bele hare ona karik ida ne’ebé seidauk halo ne’e ita bele esforsu ida ne’ebé mak di’ak ne’e ita mantein no dezafiu saida mak ita hasoru iha kampu buka solusaun oinsa mak bele ultra pasa uza ita nia maneira rasik” Dehan Diretór Servisu Agrikultur Munisipiu Covalima, Domingos Gusmão.

Entretantu Diretór Servisu Agrikultur Munisipiu Covalima, Domingos Gusmão, rekoñese durante ne’e Extensionista sira infrenta problema liga ho fasilidade motorizada ba Extensionista no Extensionista sira hela iha ida idak nia rezidensia hodi difikulta sira nia servisu iha suku ne’ebé mak sira destaka.

Jornalista : Jhana Cardoso

Editor     : Chamot Nahac