Liderança Komunitária iha Postu Suai Forma Ekípa Taskforce ba Prevensaun Covid-19

Covalima (RCCT) 26-05-21 Relasiona ho desizaun husi Minstéro Administrasaun Estatal (MAE) atu forma Ekípa Taskforce husi Nivel Suco to’o Municipio, maka Quarta-Feira ohin Liderança Komunitária hamutuk ho Administrador Posto Suai forma ona ekípa Taskforce iha Nivel Suco sira iha Postu Administrativu Suai.

Ba Jornalísta sira, Administrador Postu Administrativu Suai Laurentino de Yesus informa, forma Ekípa Taskforce iha nivel Suco ne’e atu hodi haforsa servisu Saúde sira nian iha terrenu, no Ekípa Takforce nebe maka hari’i, sei hakbesik ba Komunidade sira hodi enkoraza, oinsa komunidade sira bele simu Vasina.

ohin ami forma ekípa iha Posto Suai ba to’o Suco, atu nune’e servisu hamutuk ho Saúde, atu nune’e bele halo prevensaun ba Covid-19 ida ne’e iha Posto no Municipio ida ne’e, maibe ha’u rona katak komunidade balun lakoi vasina, ha’u la fiar ida ne’e, tanba ami ekípa taskforce ne’e sei hakbesik ba ami nia Komunidade sira hodi enkoraza ou fo hanoin atu nune’e bele sira bele simu Vasina ” dehan Administrador Postu Administrativu Suai, Laurentino de Yesus.

Laurentino dehan, Lista ekipa taskforce iha Nivel Suco iha Posto Suai preparado ona, tanba ne’e loron Quinta-Feira aban (27-05-21) Adminstrador Postu Suai sei entrega ba Administrador Municipio.

Sim Lista iha ne’e preparado ona, iha Posto ne’e, iha Suku Lima, Aldeia 34 maka preparado ona, aban ha’u sei hatama ba iha administrador Municipio Covalima ” Laurentino Esplika

Enkuanto Xefe Sentru Saúde Suai Mateus Oliveira Mendonça, Apresia ho ekipa taskfor nebe maka forma ona, liu husi Liderança komunitária nia servisu hamutuk bele assegura komunidade sira atu tuir Vasinasaun.

Ha’u Apresia tebes ho Ekípa taskforce nebe maka forma ona, atu apoio ami Saúde sira, bainhira ami hala’o ami nia servisu iha terrenu, tanba liu husi Lidernça Komunitaria nia apoio maka ita bele assegura Komunidade sira hodi tuir Vasinasaun ” Sefe Sentru Saúde ne’e hakotu.

Jornalísta : Ekípa Kobertura

Edítor      : Chamot Nahac