Covalima (RCCT) 07-12-21, Centro Nasional Chega (CNC) Lansa Muzeum memorial iha Covalima hodi tau istoria luta ba ukun rasik an ne’ebe duránte tinan naruk, hodi nune’e Jerasaun tuan no Jerasaun foun bele asessu memoria passadu.
Iha Lansamentu Muzeum Municipal iha Covalima ne’e, Presidente Konsellu Imprensa Virgilio da Silva Guterres”Lamukan” hanesan mos eis prijioneiru Politiku dehan, Muzeum espasu ba ita atu kuda no hametin esperansa ba luta ho Sofrementu naruk.
“Ita hanoin saida maka Muzeum ne’e ninia funsaun ba ita liu-liu ita sira ne’ebe sei moris, iha lema ne’ebe Centru Chega Nasional sempre hakreke “husi memoria ba esperansa” ne’ebe ha’u hanoin Muzeum sai espasu ida ba ita atu kuda hametin ita nia esperansa ba luta ho Sofrementu ne’ebe naruk, ohin Estudante sira apresenta teatru ita tahan matan ben mos la di’ak tanba ida ne’e maka ita nia istoria, kualker memoria ne’ebe ita hanoin hetan sempre trajédia “Oho malu ho Massakre” Presidente Konsellu Imprensa Virgilio da Silva Guterres hanesan eis prijioneiru Politiku dehan iha Monumentu Massakre 6 de Setembru 1999 iha Municipio Covalima.
Nia Hatutan, Muzeum sai fatin Importante ba Jerasaun foun sira atu hatene saida maka Jerasaun tuan sira halo ona ba rai ida ne’e.
” Ita Jerasaun tuan sira balu katuas ona, ne’ebe fatin ida ne’e sai enkontru de jerasaun, Jerasaun foun sira mai iha ne’e hodi hare saida maka Jerasaun tuan sira halo ona ba rai ida ne’e, mai iha ne’e lee istoria iha kotuk ne’e tenke kestiona tanba saida maka sira ne’e bele mate atu soi rai ida ne’e, no tanba saida maka ita lakoi haka’as atu kontribui ba dezenvolvimentu Iha rai ida ne’e” Virgilio kontinua dehan.
Bainhira Estudante sira hatudu teatru hodi hakilar ho liafuan “Asu Fuik’ Asu Fuik” ho ida ne’e Virgilio dehan ita sei la Asu Fuik hanesan Asu Fuik ne’ebe uluk haterus ita.
“Ita mos tenke tau hanoin katak mai Fatin Muzeum ka Fatin memorial labele sadik malu hatudu meik ho kroat, hanesan alin sira hatudu teatru hodi hakilar Asu Fuik ne’ebe hamrok ba ran, ne’ebe memoria hirak ne’e fo hanoin mai ita katak ita sei la Asu Fuik hanesan Asu Fuik sira ne’ebe uluk haterus ita, tanba ne’e maka fatin ida ne’e atu ita homan ita nia esperansa” Virgilio da Silva Gutteres “Lamukan” informa.
Nune’e Lamukan hanaruk nia Lian, Municipio Covalima, Foho Taroman ho Mota Tafara maka sai sasin ba Monumentu Masakre 6 de Setembru Suai.
“Hanesa ohin ha’u dehan Covalima, Foho Taroman sai sasin ba Monumentu Setembru Negro Suai, iha Fatin ne’e Amo na’in tolu maka sai referensia ba ita, liu-liu ohin ita ba salele avenida bo’ot ida naran avenida Taricizio Dewanto nia ema Jawa nian, maibe ida ne’e husu ita nia an katak nia ema Jawa nian maibe nia mate ba rai ida ne’e, tanba saida maka Ita labele, memorial ne’e hanesan Fatin ida atu buka hatene ita nia historia” Virgilio “Lamukan” haktenik.
Entretantu tuir matenek na’in sira hateten bainhira ita la komprende ita nia prezente tanba ita ignora ita nia passadu, tanba Populasaun iha Municipio Covalima tenke apoio malu hodi konsidera Fatin Muzeum ka Fatin memorial atu aprende historia passadu nian hodi kuda no hametin ita nia esperansa.
Jornalista : Tynho Gusmão
Editór : Chamot Nahac
