Kumpri Despaixu Anterior Husi MEJD – ESGP Suai Hahu Aula Normal

Covalima (RCCT) 13-09-21 Bazeia ba Despaixu Númeru 44/GMEJD/VIII/2021 Ministériu Edukasaun Joventude no Desportu (MEJD) Suspende actividades aula prezensial husi loron 26 Agostu to’o Loron 10 Setembru, maka Segunda Feira ohin Eskola Sekundaria Geral Publika Suai (EGSP) kumpri Despaixu anterior hodi reativa hikas aula prezensial.

Ba Jornalísta RCCT Diretor Eskola Sekundaria Geral Publika Suai (ESGP) Francelino Freitas hateten, dadaun ne’e seidauk iha karta despaixu ruma husi MEJD atu kontinua suspende aula prezensial, tanba ne’e Eskola ESGP Suai nafatin kumpri Despaixu anterior husi MEJD hodi reativa hikas prosessu aprendijazen.

” Iha despaixu Númeru 44/GMEJD/VIII/202 nebe maka iha momentu neba MEJD suspende provizoria actividades Ensinu aprendijazen, se la sala iha dia 26 Agostu to’o 10 Setembru, maibe agora dadaun seidauk iha despaixu ruma atu kontinua suspende, nebe ohin Eskola komesa fali ho aula normal “ Francelino dehan iha Salaun ESGP (13/09)

Diretor ne’e Informa, tuir karta Númeru 03/MEJD/DG-EE/IX/2021 husi Ministériu Edukasaun Joventude no Desportu (MEJD), atu kolleta kartaun vasinasaun hodi nune’e identifika Professor hira maka tuir ona Vasinasaun.

” Depois tuir orientasaun husi Ministériu Edukasaun ho karta Númeru 03 husi MEJD, katak atu kolleta kartaun vasinasaun hodi identifika Professor hira maka vasina ona, no hira maka seidauk “ Francelino Informa.

Enkuantu Professor iha ESGP Suai 95% maka simu ona Vasinasaun, ho nune’e Diretor ESGP nafatin fo avizu ba Professor sira atu kompleta ona vasinasaun atu nune’e bele halo relatorio hodi relata ba Ministériu.

” Iha Eskola ne’e 95% maka halo ona Vasinasaun, maibe Eskola fo aviza ona liu husi Pajina Eskola ninian, atu nune’e Professor sira tenke vasina ona para atu halo relatoriu ba Nasional” Francelino esplika.

Entertantu Númeru Estudante iha Eskola Sekundaria Geral Publika Suai (ESGP) hamutuk rihun rua atus ida hitu nulu resin lima (2.175), husi total ne’e Estudante nebe atinje ona idade 18 ba leten maioria simu ona Vasinasaun, no Eskola mos kria kondisaun bazeia ba regras OMS nian.

Jornalísta : Tynho Gusmão
Editor        : Chamot Nahac