KSI ho RHTO Fo Formasaun Kona ba Matéria 3 Ba Komunidade iha Suco Matai

Covalima (RCCT) 15-10-21, Organizasaun Kadalak Sulimutu Institutu (KSI) ho Raes Hadomi Timor Oan (RHTO) fo formasaun ba komunidade iha Suco Matai kona ba matéria tolu maka hanesan; Géneru nebe fasilita husi KSI no matéria Inkluzaun Difisénsia no Redusaun Risku Dezastre nian fasilita husi RHTO

Ba Jornalísta Fasilitador matéria Jéneru husi KSI Pedro Brito Fernandes hateten, objetivu husi Formasaun kona ba matéria jéneru ne’e oinsa komunidade sira bele komprende asuntu jéneru, tanba dala barak Komunidade sira seidauk komprende fahe kna’ar iha nivel uma kain nian.

” Ita mai fahe informasaun ba ita nia komunidade sira atu nune’e sira bele komprende diak liu tan kona ba asuntu jéneru ne’e, tanba dala barak komunidade sira seidauk komprende didiak fahe kna’ar ou papel iha nivel uma kain nain, tanba ne’e maka ita hasa’e Komunidade sira konesimentu oinsa sira bele komprende didiak” Pedro dehan iha Sede Suco Matai.

Iha fatin ne’e Pontu Fokal RHTO Munisipiu Covalima Onorio Gusmão hateten Esplika kona ba matéria Inkluzaun Difisénsia no Redusaun Risku Dezastre ne’e atu komunidade sira bele iha konsiensia uja termunolojia nebe dignu hodi bolu ema ho difisénsia sira, no oinsa bele salva ema ho Difisénsia sira bainhira mosu Dezastre ruma.

” Ohin matéria rua maka ami lori, ida maka konaba inkluzaun Difisénsia no seluk maka Redusaun Risku Dezastre, formasaun ne’e objetivu atu hasa’e komunidade sira nia konsiensia oinsa bele uja termunolojia ne’ebe dignu hodi bolu ema difisénsia sira no seluk maka Dezastre ne’e mosu ita la espera, entaun oinsa maka bele Salva ema ho Difisénsia sira bainhira mosu Dezastre ruma” Onorio dehan iha Sede Suku Matai.

Enkuantu formasaun ne’e durante loron ida, nebe hetan partisipasaun husi Komunidade sira iha Aldeia Matai no Kuna’in inklui Ema ho Difisénsia sira nebe hela iha Suco Matai.

Entretantu Hafoin remata iha Suco Matai, KSI ho RHTO sei kontinua fo formasaun ba Komunidade no Ema Difisénsia sira iha Suco Ogues Postu Maukatar no Suco Raimea Postu Zumalai.

Jornalísta : Tynho Gusmão
Editor       : Chamot Nahac