Covalima (RCCT) 19-01-22, Hanesan Sidadaun iha Nasaun ne’e, Populasaun iha Suco Lactos mos iha Direitu atu asesu ba iha liña eletrisidade hanesan ho Sidadaun Sira seluk iha Timor-Leste. Maibe, Komunidade iha Suco Lactos mos rejeta total Kompaña Maun Alin ROMCEAR ho HELAMULA Unipesoal Lda Mak kaer projeitu eletrisidade iha Suco lactos Postu Administrativu Fohorem.
Tanba ne’e Populasaun no autoridade lokal sira inklui Veteranus iha Suco Lactos ne’ebé lidera husi Xefe do Suco Lactos mantein pozisaun no nafatin rekomenda kampaña ESISTI,Unip. Lda Mak bele halo obra projetu dada Liña eletrisidade iha Suco Lactos nia laran.
“Povo tomak hamutuk ho autoridade lokal sira hotu inklui Veteranus iha Suco Lactos ne’e be lidera husi Xefe do Suco Lactos ho ninia estrutura tomak mantein posisaun no nafatin rekomenda kampaña ESISTI,Unup.Lda Mak bele halo obra projetu dada Liña eletrisidade iha Suco Lactos nia laran ho rajaun fundamental Sira mak ami temi iha leten no atu subliña katak Kompaña ESISTI Mak hala’o servisu desde prosesu Primeiro to’o prosesu final tenderizasaun. Ami mos hakarak haforsa tan katak Kompaña ESISTI ne’e jere husi ema Lactos oan atu bele garantia kualidade de servisu ne’ebé di’ak Liu liga ba Dezenvolvimentu Suco ne’ebé ho kualidade, Duke Kompaña sira seluk ne’ebé dala barak servisu tanba deit lukru maibe la hatudu resultadu servisu ho kualidade ne’ebé di’ak” Portavoz Rozalino Moniz Riba Rai Deklara iha Konfrensia Imprensa Tersa (17/01).
Notisia Relevante : https://www.rcct.tl/komunidade-no-veteranu-hakarak-kompana-esisti-uniplda-kaer-projetu-eletrisidade-iha-suco-lactos/
Komunidade Suco Lactos rejeta Kompaña 2 HELAMULA Unip,Lda no MAUN ALIN ROMCEAR, Unip.Lda atu Kaer Obra Konstrunsaun ba lina Eletrisidade tanba Kompaña 2 ne’e Manan ona Projetu iha Fatin seluk maibe seidauk halo servisu.
“Tuir informasaun ne’ebe ami asesu katak Kompaña HELAMULA Unipesoal Lda dadaun ne’e manan hela projetu Eletrisidade iha Suco Suro kraik Munisipiu Ainaro, Maibe seidauk implementa; neim pursentu (%) Ida; Maibe manan tan fali projetu ne’ebé hanesan iha Suco Lactos. Hanesan mos ho Kompaña “MAUN ALIN ROMCEAR ne’ebé manan ona tenderizisaun ba projetu lampu jalan iha Munisipiu Covalima mos seidauk implementa. Maibe manan tan projetu Eletrisidade iha Suco Lactos hanesan joint project ho kompanha HELAMULA Unipesoal Lda.” Tenik Portavoz Rozalino Moniz Riba Rai iha Konfrensia Imprensa.
Enkuantu Komunidade, Juventude no Veteranu iha Suco Lactos husu ba Prezidenti EDTL.EP atu tetu Didiak molok Foti Dezisaun ba Manan Nain projetu dada lina Eletrisidade iha Lactos.
“Ho rajaun hirak ne’ebé ami sita iha leten, hakarak mos hato’o ami nia rekomendasaun ba Sua. Exce. Prezidenti EDTL EP atu hare no tetu didi’ak antes foti desijaun ikus ba prosesu tenderizasaun dada Liña eletrisidade ka projetu seluk atu labele kria diskriminasaun entre kontraktor Sira” Tenik Portavoz Rozalino.
Entretatu to’o Notisia ne’e Hatun RCCT seidauk Halo Konfirmasaun ho Parte EDTL.EP no Orgaun Kompotente Seluk relasiona ho Tenderizasaun dada lina eletrisidade iha Suco Lactos ne’e.
Jornalista : Saturnino Soares
Editor : Chamot Nahac
