Covalima(RCCT) 09-05-22–EDTEL.EP Unidade Covalima monta ona prepagu iha komunidade sira uma, maibe Konsumidor Liña Eletrisidade iha Postu Administrativu (PA) Fohorem Suku Fohorem Vila hamotuk uma kain 410 seidauk hatene ense pulsa eletrisidade (Token).
Ko’alia ba RCCT Xefe Suku Fohorem Fernando Ferreira iha nia k’nar fatin Sexta Feira(06/05) hatete, Konsumidor Eletrisidade iha Suku Fohorem infrenta susar atu hetan pulsa Eletrisidade(TOKEN), no mos konsumidor sira seidauk hatene oinsa atu ense numeru TOKEN ba iha kontrador (Prepagu) ne’ebé monta ona iha sira nia uma.
“Konaba monta prepagu Komunidade barak mak kestiona konaba monta prepagu, sira prontu atu sosa pulsa maibe iha momentu ne’eba sira husi EDTL,EP la mai halo Sosializasaun konaba fatinatu sosa Pulsa ne’e iha ne’ebé no mos se mak fa’an, depois sira nia preokupa hanesan ne’e sira sosa hotu pulsa sira ense mos la hatene ida ne’e mak sira hato’o ba ha’u atu nato’o netik ba Lideransa Munisipiu.” Xefe Suku Fohorem, Fernando Ferreira, hatutan Komunidade sira nia lian.
Hatan ba preokupasaun ne’e Xefe Unidade EDTL.EP iha Munisipiu Covalima Alexandre Seran informa, Komunidade sira ne’ebé ladauk hatene oinsa atu ense pulsa Eletrisade bele hakbesik ba pesoal EDTL.EP sira ne’ebé destaka ona iha PA Fohorem, Fatumea no Tilomar.
“Iha ne’eba ne’e ami tau ona ami nia estaf na’in rua ida iha PA Fohorem no ida iha Postu Tilomar atu nune’e komunidade sira iha ne’eba duvidas karik, bele husu iha ne’eba sira bele hatudu, bele ba ajuda oinsa atu bele ense pulsa ne’e para ahi bele lakan” Informa Xefe Unidade EDTL.EP iha Munisipiu Covalima Alexandre Seran ba RCCT iha Knar fatin Segunda Feira (09/05) ohin.
Konaba komunidade Fohorem susar asesu ba Pulsa Eletrisidade, Alexandre Seran klarifika iha ona Kompaña mak ba regista iha Nasional no sosa ona equipamentus ba pulsa eletrisidade nian hodi bele atende komunidade sira iha Postu Administrativu Fohorem, Fatumea no Tilomar .
“Iha ne’e ha’u haruka ona Kompaña sira ba registu iha Nasional atu nune’e sira bele faan pulsa ba iha Postu Administrativu Fatumea no atende ba iha Postu Tolu hanesan Fatumea, Fohorem no Tilomar, maibe agora dadaun Kompaña ne’ebé atu atende konaba pulsa eletrisidade ne’e sei ba iha Dili hodi sosa nia equipamentos hanesan laptop , printer no modem” Nia hatutan
Entretantu Alende Konsumidor Liña eletridade sira iha Fohorem seidauk hatene Ense Pulsa Eletrisidade no susar hetan Pulsa, Eletrisidade iha Fohorem mos sempre lakan mate, maibe ba kestaun Ahi Lakan mate bebeik ne’e Xefe Unidade EDTL.EP iha Munisipiu Covalima Alexandre Seran informa, ida ne’e akontese tanba Impaktu husi udan no anin bo’ot.
Jornalista : J. Correia/Nascimento
Editor : Chamot Nahac
