Komunidade Afetadu Aeroportu Kay Rala Xanana Gusmão Ezizi Governu Atu Halo Re-alokasaun

Covalima (RCCT) 23-09-21, Komunidade afetadu sira iha Suco Labarai Aldeia Roek nebe afeta ba dezenvolvimentu Aeroportu Kay Rala Xanana Gusmão, ezizi Governu atu halo Dezenvolvimentu re-alokasaun ba sira, tanba iha Suco balun Governu halo ona re-alokasaun ba Komunidade afetadu sira, maibe iha Suco Labarai Aldeia Roek durante tinan lima ona Governu seidauk foti desizaun ruma hodi halo Re-alokasaun ba Komunidade afetadu sira iha Suco Labarai.

Xefe Suco Labarai Mouzinho Amaral hateten, prosessu Konstrusaun Uma ba Komunidade afetadu sira ne’e hahu iha tinan 2015, maibe konsege finaliza ona iha Suco Matai Aldeia Lohorai, maibe to’o agora Governu seidauk foti desizaun ruma ba Komunidade afetadu sira iha Suco Labarai.

” Ha’u hanesan Sefe Suco hakarak hato’o hau nia Komunidade nia preokupasaun konaba Konstrusaun uma ba Komunidade afetadu sira, husi Tinan 2015 hahu Konstrusaun Uma ba Komunidade afetadu no konsege finaliza ona iha Suco Matai Aldeia Lohorai, maibe iha hau nia Suco ne’e rasik Governu seidauk foti desizaun ruma, tanba ne’e hau nia Komunidade sira atu halo uma diak mos labele tanba Governu Atu foti sira ba iha Bairo seluk, tanba ne’e maka hau nia Komunidade sira ezizi Governu ne’e ” Sefe Suco Labarai dehan.

Xefe Suco ne’e Informa, iha tinan 2020 Liu ba Xefe Suco ne rasik akonpanha publikasaun iha média Sosial katak, iha ona Kompanha balun maka atu halo projetu hirak ne’e, maibe to’o agora la iha rejultadu ruma.

” Ami hanoin buat hotu rezolvidu ona tanba Komunidade sira hamutuk ho Timor Gap halo enkontru iha Salaun Administrasaun Munisipiu, depois antes tinan foun Hau hare publikasaun iha média Sosial katak iha ona kompanha balun maka atu halo ida ne’e, maibe tinan 2021 atu remata ona mos la iha informasaun ruma husi Timor Gap no Governu rasik, nebe rejultadu to’o agora la iha “ Sefe Suco Informa.

Hatan ba preokupasaun ne’e Ministru Petroleo do Rekursu Minerais Victor da Conceicão Soares hateten, tuir lolos hahu halo ona Konstrusaun ne’e, maibe Ministru Petroleo Rekursu Minerais simu Keixa barak husi Emprezariu sira nebe envolve iha konkursu atu halo Konstrusaun ne’e, ho nune’e maka durante ne’e impede hela prosessu Dezenvolvimentu Rea-lokasaun ba Komunidade afetadu sira.

” Desde Ha’u hala’o kna’ar Hau simu Keixa barak husi Emprezariu sira nebe maka envolve iha konkursu atu halo Konstrusaun ne’e, prosessu nebe durante ne’e halo, Timor Gap anterior la halo konkursu publiku no la halo transparente, to’o sira ameasa malu atu lori ba tribunal, tanba ne’e maka impede hela ” Governante ne’e dehan.

Engkuantu Ministru Petroleo Rekursu e Minerais ne’e Informa Dadaun ne’e halo ona prosessu foun, tanba ne’e Ministru ne’e promesa tempu badak sei halo Konstrusaun Uma ba Familia Afetadu sira.

Entertantu total familia Afetadu iha Suco Labarai Aldeia Roek Uma kain hamutuk 62.

Jornalísta : Tynho Gusmão

Editor       : Chamot Nahac