Covalima (RCCT) 20-08-21,Timor-Leste Komemora Loron Falintil ba dala 46, Loron nebe hanesan Loron Istória ba Timor, tanba la iha Falintil maka Timor sei la ukun rasik an.
Representante Konsellu Veteranus iha Municipiu Covalima Francisco Doutel, Kódigu “La Mesak” konsidera Komemorasaun Loron Falintil importante ba Rai Timor, no hanesan figura ida nebe di’ak ba jerasaun foun sira atu bele banati tuir.
La Mesak esplika se la iha Falintil la iha mos loron 28 de Novembru, tanba loron 28 de Novembru ne’e mosu tanba Falintil sira halo funu.
“ Ha’u hanesan ema Veteranus ida, Loron ohin importante tanba loron Istória ba Timor, tanba se Falintil la iha mos Timor ne’e sei lan ukun rasik an, nebe ohin loron ohin loron nebe harii Falintil, depois loron 28 de Novembru ne’e sei la mosu bainhira la iha Falintil, tanba Falintil halo funu ne’e maka loron ne’e mosu, nebe hanesan mos figura ida ba jerasaun foun sira para bele banati tuir ” Lamesak dehan iha nia Rezidênsia iha Aldeia Asumaten (20/08).
Francisco Doutel Lamesak sente triste tanba la iha eventu Komemorasaun Loron Falintil iha Municipio sira, tanba Timor Leste infrenta hela situasaun Estadu Emergensia, maibe La Mesak dehan, Tuir lolos Governu tenke konsulta ho CCLN tamba CCLN maka nain ba Funu.
“ Ha’u sente triste, tanba ita hare iha tempo uluk ho agora ne’e la hanesan, uluk komemorasaun loron liman kroat Povu Maubere nian ne’e iha Municipiu ne’e iha hotu, maibe ida ne’e iha Municipio sira paradu total so iha deit kapital Dili, maibe tuir lolos ne’e Governu atu halo buat ruma tenke konsulta ho Conselho Combatentes Libertasaun Nasional (CCLN) tamba CCLN maka nain ba Funu ” Lamesak dehan.
Entertantu Francisco Doutel ho kódigu “Lamesak” enkoraja Jerasaun foun sira, atu estuda Istória Timor nian hodi bele hatene prosessu tomak ba ukun rasik’an.
Reportajen : Jefri/Rony
Editor : Chamot Nahac
