Komemora 20 Maiu ba Dala XX- Ekipa Kontributor Tulun Ai Han ba Ema Difisiensia no Familia Volnuravel

Covalima (RCCT) 16-05-22– Ekipa Kontributor ba atividade Komemorasaun Restaurasaun Independensia ba Dala XX, Kompostu husi Oranizasaun Hitu mak hanesan; Eskola Sekundaria Geral Publiku (ESGP) Suai, Radio Comunidade Cova Taroman (RCCT), Universidade da Paz (UNPAZ) Ramu Suai, Centro Juventude Covalima (CJC),Konsellu Nasional Juventude Covalima (KNJC), Eskola Tekniku Vokasional (ETV) Cristal Suai no Asosiasaun Estudante Juventude Suai (AEJS) apoiu nesesidade báziku ba Familia Volnuravel no ema ho difisiensia hamotuk Familia neen iha Aldeai Ai Oan, suku Lalawa Postu Administrativu (PA) Tilomar.

Silvester Ferreira hanesan Xefe Ekipa Kontributor, hateten atividade Apoiu nesesidade bazika ne’e Junta hamotuk hodi Komemora Loron Restaurasaun Independensia Timor Leste ba Dala XX no refleta katak sidadaun hotu hotu presiza fo liman ba malu, tan ne’e Ekipa ne’e rasik kotribui hamotuk sasan no osan hafoin indetifika benefisiariu sira molok fahe sasan.

Molok ne’e ami nia ekipa identifika uluk familia k’biit laek sira inklui maluk difisiensia sira, entaun ohin mai apoiu ba sira tuir buat ne’ebé ami tau hamutuk, hanesan osan, fos inklui supermi ba sira ne’ebé la hetan rendimentu lor-loron,” katak Xefe Ekipa Silvester Ferreira ba Jornalista sira iha Rai Hun, Aldeia Ai Oan, Suku Lalawa, Segunda Feira Ohin.

Nia hatutan, Ekipa Kontributor ne’e sei kontinua halibur malu ho Komitmentu Voluntariu no mos atividade tulun malu ne’e la’ós to’o iha ne’e deit, maibe sei kontinua tau hamotuk forsa no rekursu hodi tulun maluk sira ne’ebé persija.

Ekipa Kontributor ne’e lapara iha ne’e, sei kontinua la’o ho komitmentu ida katak, sei halibur malu bebeik, sei tau hamutuk forsa no rekursu, se mak laiha kbiit hodi hetan rendimentu, ami voluntariumente hatama nia hodi hola parte iha atividades ne’e, ami la’o neneik mais la’o ba bebeik,” Tenik Silvester.

Xefe Aldeia Ai Oan, Suku Lalawa, Manuel Amaral, apresia Ekipa kontributor nia insiativu hodi apoiu ona nia komunidade inklui maluk defisiente na’in neen iha ninia Aldeia.

Ha’u sentimentu orgullu no agradese tebes, tanba ekipa ne’e mai halo ona karidade ba ema k’biit laek no difisiensia na’in neen, iha ha’u nia Aldeia ne’e.” Manuel ko’alia ho haksolok.

Aktividade tulun malu ne’e Ekipa Kontributor sei Kontinua halo ba Benefisiariu sira neebe identifika ona iha Suku Kamanesa, Aldeia Sanfuk, Suku Debos, Aldeia Lakonak no Fatin sira seluk ne’ebé mak ekipa rekolla ona benefisiariu.

Enkuantu ba Komemorasaun Loron Restaurasaun Independensia Timor Leste ba Dala XX iha Covalima, Ekipa Kontributor ne’e Inisia Atividade Tolu iha Ambitu Komemorasaun mak hanesan; Halo Asaun Sosial “ Limpeza no Asaun Karitativa” ne’ebé hahu ona ohin (16/05) ba Benefisiariu na’in neen iha Suku Lalawa, no sei kontinua halo Limpeza aban, loron 17 fulan Maiu, Kalan Haksolok hodi Anima Povu Covalima, ne’ebé sei realiza iha Kampu Ladi iha 18 fulan Maiu Hahu oras Tuku 05:00 to’o remata, Loron 19 Fulan Maiu realiza Seminariu Edukativu ba Juven no Estudante sira ne’ebé sei Hala’o iha Salaun ESGP Suai, Hahu Oras Tuku 09:00 dader to’o Remata.

Jornalista : Juvita/L.Nascimento

Editor      : Chamot Nahac