Covalima ( RCCT) 17-12-21, Komandu Polisia Nasional Timor Leste (PNTL ) realiza Serimonia Promosaun Antiguidade 3O Kursu na’in Walu ( 8 ) husi Diviza Ajenti ba Ajenti Prinsipal.
Iha Seremonia ne’e Komandante Polisia Covalima, Super-Intendente Antonio Maria de Sa iha nia deskursu hateten Komandu Jeral Polisia Nasional Timor Leste hatun despaixu ba Promosaun Antiguidade ne’e iha Jornal da Republika iha loron 10 fulan Novembru Tinan 2021.
“ Husi Komandu Jeral Polisia Nasional Timor Leste hatun despaixu ba Promosaun Antiguidade ne’e iha Jornal da Republika iha loron 10 fulan Novembru Tinan 2021, tuir lolos ne’e, Promosaun Antiguidade ne’e halo ba Membru PNTl ne’ebé mak klase hanesan ka turma ne’ebé hanesan, Promosaun Antiguidade ka aumenta diviza ne’e normalmente ba sira ne’ebé mak la iha kazu pendente ruma no Promosaun Antiguidade ne’e bazeia ba lei, tuir dedikasaun husi tinan lima ba leten mak bele halo promosaun Antiguidade ba sira ” Katak Komandante Polisia Covalima, Super-Intendente Antonio Maria de Sa iha nia deskursu.
Notisia Relevante : https://www.rcct.tl/sexta-feira-aban-membru-pntl-iha-covalima-nain-8-sei-aumenta-diviza/
Komandante Polisia Covalima ne’e hatutan tuir lei no tradisaun militar ninian halo promosaun Diviza ne’e la’os aumenta deit sira nia Salariu maibe aumenta mos responsabilidade servisu iha Instituisaun laran.
“ Tuir Tradisaun, Kultura Militar ninian bainhira halo promosaun Antiguidade ne’e aumenta sira nia salariu no mos aumenta sira nia responsabilidade servisu iha Instituisaun nian, nune’e hodi serbi no proteje ita nia komunidade sira, Ha’u hakarak hateten mos ami hotu hahu husi Komandante Superior ba to’o soldadu sira molok tama akademiku tenke juramentu ba regulamentu displinadu artigu nen ( 6 )” Tenik Komandante Polisia Covalima.
Nia Sublina Papel Polisia Nasional Timor Leste nian mak servisu ho imparsialidade la hare ba nia nia grupu, rasa, kor, reliziun no la iha partidu, maibe Polisia hare deit servisu tuir lei ne’ebé haruka.
“ Papel Polisia Nasional Timor Leste nian servisu imparsial, hare intervensaun no servisu sira no desenpenu nia papel nia la hare nia grupu , la hare nia rasa, la hare nia kor, etniku reliziun no la iha partidu, juranmentu ne’e define iha artigu nen ( 6 ) iha konstituisaun Republica Democratica Timot Leste (C-RDTL) ne’ebé fo kompetensia, papel Polisia Nasional Timor Leste la iha partidu ruma, kompri deit mandatu ne’ebé mak Konstituisaun Republika Demokratika Timor Leste ( RDTL ) fo .” Sublina Komandante Polisia Covalima, Super-Intendente, Antonio Maria de Sa.
Entretantu Iha deskursu ne’e Komandante PNTL Covalima Super-Intendente Antonio Maria de Sa, husu ba Membru Polisia sira iha Munisipiu Covalima atu servisu ho imparsialidade hodi fo seguransa maximu ba komunidade sira tuir lei inan haruka.
Jornalista : Saturnino Soares
Editor : Chamot Nahac
