Covalima (RCCT) 22-06-21, Komandante PNTL Covalima Super Intendente Polisia Antonio Maria de Sa, deseza estudante no komunidade sira nebe foin fila husi Dili mai Covalima atu bele apela nafatin ba familia sira nebe atu fila husi Dili mai Suai tenki halo tuir maneira nebe Ekipa Servisu Covalima Vitoria ho Domun 20 (EKSES-COVID20) halo dadaun tanba ne’e konsidera hanesan maneira ida nebe diak ba prevensaun covid-19 no Kumpri regras nebe fo sain husi Sentro Integradu Jestaun de Krizi (SIJK).
Nune’e mos Komandante Polisia Covalima husi ba Estudante sira atu kopera ho Ekipa Task Force nebe Forma ona iha Suco no Aldeia ho Kombate Covid-19.
“Ekipa Task Force forma ona iha Suco no Aldeia, tanba ne’e husu ba imi atu kopera diak ho ekipa ne’e hodi bele kontribui ba prevensaun Covid-19 iha ita nia Municipio ida ne’e” Katak Komandante Polisi Covalima Antonio Maria de Sa iha Komando PNTL Covalima Segunda (21-06) wainhira halo intervensaun iha serimonia Ekses Covid20 intrega komunidade no Estudante na’in 242 ba Autoridade Covalima.
Komandante Antonio mos husu ba estudante sira nebe foin fila mai husi Dili atu sai matan tilun no ibun Estadu nian hodi reprezenta orgaun estadu nian nune’e bele kontinua apela nafatin informasuan ba komunidade sira hodi kontribui prevensaun ba Covid-19.
“Husu ba imi atu reprezenta orgaun estadu nian iha komunidade nia let hodi kontinua apela nafatin informasaun ba inan no aman atu halo prevensaun ba covid-19” tenik Komandante Antonio.
Iha fatin hanesan Administrador Covalima Francisco de Andrade mos enkoraza estudante sira atu kontribui hodi kombate Covid-19 nune’e bele hakotu lalais Serka Sanitaria iha covalima.
“Iha Aldeia no Suco hotu iha ona Ekipa Tasks Force nebe ita forma ona, husu ba imi atu hakbesik aan sira, Hau esperasa ba ita bo’ot sira atu hamotuk ho inan aman sira no autoridade lokal sira, atu ita hamotuk bele hakotu lalais korente Covid-19 nune’e ita bele livre ona husi Serka Sanitaria ne’e” Dehan Administrador Covalima Franscisco de Andrade.
Lia hirak ne’e hato’o iha Komandu Polisia Nasional Timor Leste iha Covalima nebe lokaliza iha Santa Rosa Suco Debos Postu Administrativu Suai.
Kobertura : Jornalista Estudantil “Rony Amaral” ba RCCT
Editor : Chamot Nahac
