Kandidatu 266 Konkore Vaga Iha CNE Covalima – Na’in 113 Passa Ona Ba Teste Orál

Diretór CNE Munisipiu Covalima iha nia kna’ar Fatin Edifisiu CNE. FOTO RCCT/Tynho Gusmão

Covalima (RCCT) 07-01-22, Prosessu teste ba kandidatus sira ne’ebé kompete ba vaga iha Centru Nasional Eleição (CNE) Munisipiu Covalima ba pozisaun Ofisiál Supervizaun Eleitoral ne’ebé hahu iha Loron 29 Fulan Dezembru tinan kotuk(2021) tama ona ba prosessu teste orál.

Diretór CNE Munisipiu Covalima Hermenegildo de Sena informa, husi inisiu kandidatus hamutuk 266 maka hatama vaga iha CNE Covalima, maibe husi total ne’e na’in 113 maka passa ba prosessu teste oral.

“Hahu inisiu ema hatama vaga ne’e hamutuk 266, entaun iha selesaun dokumentus nain 157 maka passa depois teste eskrita ami hare rejultadu ne’e nain 113 maka liu, ida ne’e maka agora dadaun ami fo teste oral hela” Hermenegildo de Sena dehan iha nia Kna’ar fatin (07/01).

Diretór CNE Covalima ne’e informa, sei hare rejultadu konaba teste orál ba Kandidatus 113, hafoin koloka ba iha Sentru no Estasaun hamutuk 92 ne’ebé ezisti iha Munisipiu Covalima.

” Kandidatus sira ne’e ita bolu dehan Ofisiál Supervizaun Eleitoral, sira ne’e sei koloka ba iha Sentru no Estasaun hamutuk 92 ne’ebe ezisti iha Munisipiu Covalima” Hermenegildo informa.

Entretantu Diretór ne’e garantia teste orál ba Kandidatus 113 ne’e sei remata ohin (07-01), maibe data anúnsiu seidauk determina tanba sei hein orientasaun husi Nasionál.

Jornalista : Tynho Gusmão

Editór : Chamot Nahac