Jullu To’o Novembru Pradet Covalima Rejista Kazu Hamutuk 19 – Kazu VD Kontinua Mantein Numeru As

Letratu: Kordenadora Pradet Fatin Hakmatek Suai Imelda Imaculada Moreira. FOTO RCCT/ Tynho Gusmão

Covalima (RCCT) 15-12-21, Husi Fulan Jullu To’o Novembru Pradet Fatin hakmatek Suai rejista kazu hamutuk 19 ,kompostu husi Kazu Abandona, Violénsia Doméstika (VD), Violénsia Sexual (VS), Trafiku Humanu, inklui Violénsia Fíziku(VF).

Ba Jornalista sira Cordenadora Pradet Covalima Imelda Imaculada Moreira iha intervista hateten, husi total kazu ne’e, Kazu Violénsia Doméstika maka númeru as iha Covalima.

“Husi Jullu to’o Novembru Pradet Suai rejista kazu hamutuk sanulu-resin-sia (19) husi tipu Kazu abandona na’in ida, Violénsia Doméstika formal liu na’in ida, Violénsia Doméstika no fíziku na’in sia, Violénsia Doméstika no Violénsia Sexual deit na’in ida, Violénsia fíziku la’os Violénsia Doméstika na’in rua, Violénsia Sexual la’os Violénsia Doméstika na’in ha’at, trafiku Umanu no Violensia Seksual La’os Violénsia Doméstika na’in ida, husi Kazu ne’e Violénsia Doméstika maka númeru as” Kordenador ne’e dehan iha Edifisiu Pradet fatin Hakmatek Suai (15/12).

Kordenadora ne’e dehan Kazu hirak ne’e to’o ona iha Ministériu Públiku (MP) hodi halo preosessu tuir dalan Justisa.

“Kazu hirak ne’e agora dadaun ami haruka ona ba iha Ministériu Públiku” Kordenadora informa.

Entretantu Kordenadora ne’e husu ba Populasaun sira iha Covalima, atu nafatin pasensia ho Fuan bo’ot atu nune’e bele hamenus ka minimiza Kazu hirak ne’e, liu-liu Kazu Violénsia Doméstika ne’ebé númeru as iha Covalima.

Jornalista : Tynho Gusmão

Editór       : Chamot Nahac