Covalima (RCCT) 05-09-21, Veteranus Julio Alves Amaral alias “Leto Kiak Ata” lamenta ho Estrutura Veteranus Munisipiu Covalima inklui Autoridade Postu Maukatar nebe la partisipa Serimonia Funebre ba Saudozu Filomeno Amaral ho Kodigu Rusa Fuik iha loron Domingo ohin (05/09), nebe mate iha Loron Sesta-Feira liu ba (03/08).
Ba Jornalísta RCCT Veteranu Julio explika, Saudozu Veteranu Filomeno Amaral ho Kodigu Rusa Fuik mos Sakrifisa nia an iha Funu ba Libertasaun Nasional, tan ne’e Nia sente triste tamba la iha partisipasaun husi Autoridade iha Postu no Reprezentante Estrutura Veteranus Munisipiu Covalima.
“Ha’u nudar ema Veteranu bo’ot ida, Ha’u sente triste tebes tanba Veteranus sira iha foho ne’e maka mate, kuitadu sira Haruka deit kaisaun ho Bandeira ida, maibe kuitadu Veteranu ida maka mate, la iha Reprezentante Veteranu ida husi Munisipiu, la iha Autoridade Postu maka iha ne’e, tanba ne’e maka ha’u hare triste tebes Tamba ohin ne’e ita hare hanesan hakoi ema Simples ida, ohin ita hakoi dadaun ne’e, nia mos partisipa nia an iha prosessu Funu Libertasaun Nasional, no nia mos ema difisiente ida tamba hetan tiru husi TNI iha tinan 1976, maibe kuitadu ema Veteranu ida maka hakoi Simples los hanesan ne’e “ Julio dehan iha semiteriu Santa Krus Lela.
Saudozu Veteranu Filomeno Amaral ho Kodigu Rusa Fuik hakotu is iha loron Sexta-Feira (03/09) no halo Serimonia Funebre iha Loron Domingo ohin (05/09).
Entretantu Julio Alves Amaral alias Leto Kiak Ata husu ba Estrutura Veteranus Munisipiu Covalima inklui Autoridade Lokal sira iha Postu no Suku, atu partisipa bainhira Veteranus ruma mate tamba konsidera hanesan Heroi ba Nasaun Timor-Leste.
Jornalísta : Tynho Gusmao
Editor : Chamot Nahac
