Covalima (RCCT) 28-12-21, Juventude iha Suco Raimea, Postu Administrativu Zumalai Munisipiu Covalima ho inisiativa rasik kompetisaun Hananu ne’ebé hatur ho tema ” Mai Hatudu Ita nia Talentu Iha Hananu” ho hakarak atu promove jerasaun foun iha Suco laran ne’ebé talentu Hananu.
Ba Jornalista sira Xefi Komisaun (KO) ba Kompetisaun Hananu ne’e, Luis da Silva hateten, ho objektivu loke Eventu no Kompetisaun ba Hananu ida ne’e atu kaderniza Jerasaun foun sira nia hanoin liu-liu atu hasa’e sira nia mentalidade.
“Loke eventu ida ne’e atu hodi kaderniza ita alin sira nia hanoin liu-liu atu hasa’e sira nia mentalidade no atu hatudu sira nia talentu iha komunidade sira nia let, karik sira iha oportunidade ne’ebé di’ak ba futuru ne’e ami bele lori sira ba kompete iha Munisipiu, no kompetisaun ne’e hahu iha Loron 26 fulan 12 remata iha Loron 30 tinan 2021 ne’e” dehan Xefi Komisaun ba Kompetisaun Hananu Luis da Silva
Ho nune’e Luis da Silva fundamenta, Kompetisaun hananu ne’e hanesan premeira vez realiza iha Suco laran no iha futuru sei hala’o di’ak liu tan.
” Ba eventu kompetisaun Hananu ida ne’e ami apresia tanba foin mak premeira vez loke iha ami nia Suco ida ne’e maske ho fundus ne’ebé mak ki’ik tebes, no espera katak tuir ami Juven nia forsa ne’ebé mak iha ho inisitiva rasik hakarak promove ita nia alin sira liu husi eventu simples sira hanesan ne’e depois ba futuru sei halo di’ak liu tan no suporta ba eventu ida ne’e suporta husi maun, tiun, juven inklui mos husi Estudante sira nebe mak iha Kapital Dili” katak Luis da Silva
Luis da Silva mos esplika, Manan Na’in iha Kompetisaun ne’e, Primeiru lugar hetan Orsamentu ho montante $ 50 dolares Amerikanu, Segundu Lugar $ 30 dolares, Terseiru Lugar $ 20 dolares no Kuatru Lugar $ 15 dolares.
“Kona ba Eventu Kompetisaun ba Hananu ida ne’e Primeiru Lugar hetan Orsamentu ho nia montante hamutuk $ 50 dolares Amerikanu, Segundu Lugar $ 30 dolares Terseiru Lugar $ 20 dolares no Kuatru Lugar $ 15 dolares tanba ita hare fundus nebe mak minimu tebes no Konkorentes sira nebe mak iha Grupu A no B mak balun lakon iha kompetisaun ne’e prepara an nafatin atu nune’e labele kontinua fali iha tinan 2022” teknik Luis da Silva
Entretantu iha Kompetisaun Hananu ne’e Konkorentes hamutuk na’in 10 kompostu husi Mane na’in 5 no Feto na’in 5, no eventu ne’e sei realiza durante loron 5, hahu iha Loron 26 fulan Dezembru no sei remata iha Loron 30 tinan 2021
Jonalista : Aje Ferreira
Edito : Chamot Nahac
