JDN Divulga Informasaun Ba Komunidade Ne’ebé Hela Iha Area Risku Dezastre

Hamrik husi Parte karuk Cordenador CVTL Filial Covalima, tuir Administrador Munisipiu Covalima, tuir Diretór PSJDN Covalima, no Parte los Comandante Bombeiros. FOTO RCCT/Tynho Gusmão

Covalima (RCCT) 20-01-2022, Ekipa Jestaun Dezastre Naturais (JDN) iha Munisipiu Covalima halo lansamentu divulgasaun informasaun ba Komunidade sira ne’ebé hela iha área risku ba dezastre naturais relasiona ho Fenomena La Niña ne’ebé maka atu akontese iha teritóriu Nasional.

Administrador Munisipiu Covalima Francisco de Andrade hanesan Komisaun Dezastre Naturais, hateten, lansamentu divulgasaun informasaun ba komunidade sira ne’e oinsa komunidade sira bele iha preparasaun bainhira akontese udan no anin bo’ot.

Ita iha ona ekipa voluntáriu sira atu halo prevensaun bainhira udan no anin bo’ot ne’ebé dadaun ne’e akontese iha teritóriu Nasional, tanba ne’e maka ita lansa para fo hanoin ba komunidade sira oinsa maka bele prepara sira nia aan, tanba uluk akontese hanesan ne’e ita hakfodak deit uma balu mota lori, ne’ebé ita lakoi buat ida ne’e akontese tan” Administrador dehan bainhira halo lansamentu ba Divilgasaun Informasaun ne’e iha Edifisiu Administrasaun Munisipiu nia oin (20/01)

Iha fatin ne’e Diretór Servisu Munisipal Protesaun Sivil Jestaun Dezastre Naturais Munisipiu Covalima Quintino da Costa informa, Sei halo divulgasaun Informasaun ne’e hahu husi Fronteira Salele Postu Tilomar to’o Postu Administrativu Zumalai.

Ita iha rute divulgasaun ne’ebé maka ita prepara ona, tanba ne’e sei hahu husi Fronteira Mota Masin to’o Postu Zumalai, rai tetuk sira ne’ebé maka babain bee sa’e ita sei kobre hotu para sira bele iha preparasaun bainhira La Niña ne’e akontese” Diretór ne’e informa.

Entretantu Lansamentu ne’e realiza iha Administrasaun Munisipiu Covalima, no Ekipa konjuntu ne’ebé halo divulgasaun informasaun ne’e kompostu husi Protesaun Sivil, Bombeiros, Seguransa Sivil, inklui RHTO no CVTL Filial Covalima.

Jornalista : Tynho Gusmão

Editór      : Chamot Nahac