Covalima (RCCT) 05-11-21. Ministériu Edukasaun Joventude no Desportu (MEJD) liu husi INFORDEPE hamutuk ho Parseiru Apoio Lideransa liu husi Mentoria no Aprendijazem (ALMA) fo formasaun kona ba jestaun lideransa nian ba Diretur, Adjuntu, no Kordenador Eskola Báziku Filial no Central (EBF no EBC) sira iha MuniCipiO Kovalima inklui Feto Potensiais sira nune’e bele halo jestaun nebe di’ak iha Eskola liu-liu ba prosessu ensinu aprendisazem.
Ba Jornalísta sira Vise-Presidente INFORDEPE Rui da Costa Belo hateten, Formasaun ne’e hala’o atu kapasita Lideransa Eskola sira hodi bele orienta Professor sira atu hanorin Alunus tuir kurikulum nebe iha.
” Formasaun ne’e kona ba Jestaun Lideransa ninian, oinsa maka Diretur sira bele iha Koñesimentu hodi halo observasaun ba Professor sira nebe maka hanorin iha turma laran, atu nune’e jestaun ne’e bele di’ak, liu-liu ba prosessu aprendijazem ninian, tanba duránte ne’e Diretur balun la monitor ninia Professor sira nebe hanorin iha sala laran, nebe Diretur sira mos tenke iha Koñesimentu kona ba Planu da lisaun ka metrosentradu alunu sira ne’e oinsa, atu nune’e sira mos bele hadi’a bainhira Professor sira hanorin la los” Vise-Presidente INFORDEPE dehan.
Partisipantes Kordenador EBC Dato-Tolu Adão da Cruz konsidera Formasaun ne’e importante hodi bele diriji Professor sira atu hanorin tuir kurikulum ka metodu nebe iha, tanba durante ne’e Infrenta Difikuldades kona ba Jestaun de Liideransa
“Ami hanesan Lideransa iha Eskola durante ne’e ami hasoru difikuldade liu-liu Jestaun Lideransa nian, tanba ami menus koñesimentu kona ba matéria ida ne’e, nebe formasaun ida ba ha’u importante atu nune’e ami bele hatene oinsa maka bele diriji ka orienta ami nia Professor sira hodi hanorin Estudante sira tuir kurikulum no hanorin ho metodu nebe maka tuir padraun” Adão dehan.
Entretantu Formasaun kona ba Jestaun Lideransa ne’e realiza iha Salaun Eskola Sekundaria Jeral Públika (ESJP) Suai, nebe hala’o durante loron rua, hahu Sesta-Feira ohin (05/11) sei remata iha Loron Sabado aban (06/11), no tuir Planu Formasaun ne’e sei kobre teritoriu Nasional.
Jornalísta : Tynho Gusmão
Editor : Chamot Nahac
