Covalima (RCCT) 09-06-21 Peskador no Negosiante Ikan iha Suco Suai Loro Postu Suai, Municipio Covalima durante ne’e hetan menus sira nia Rendimentu, Tanba Impaktu husi Serka Sanitária (SS) Estadu Emergensia (EE), Tanba ne’e kada loron hetan deit rendimentu Dolar $ 5 to’o 10.
Lia hirak ne’e hato’o husi Peskador Adalberto Gonsalves iha loron Tersa Feira (08-06) ne’e iha tasi Suku Suai Loro.
” Ágora moras Covid-19 ne’e halo ami tama tasi laran mos baruk tanba ami nia langanan sira mos ladun telfone ami atu sosa ami nia ikan ,tanba sira dehan simu ikan husi ami ba fa’an ema la hola hanesan uluk ,Depois fulan Maio no Juni ne’e ikan la iha, no mos Laloran bo’ot halo nebe ami mos ta’uk atu tama tasi, nebé ami ho Vero tama tasi ne’e ami buka modo Meudia no kalan nian deit, ami hetan Ita oan ona ami sae ona, tanba ita hetan barak mos ema la hola depois anin mos bo’ot,” Peskador Alberto dehan.
Iha sorin seluk Agustino Gonsalves Afirma, Situasaun Atual halo Presu ikan tun no ema nebe atu sosa mos menus.
” Dalaruma hetan Ikan barak maibe ema atu sosa mak araska, nebe dala barak ema la sosa, balu ami habai halo maran, nebee osan mak susar nebe ema empregadu ka Servisu sira ne’e sosa, maibe uluk Covid-19 ne’e seidauk iha ne’e ema hotu sosa ne’e be ami fila ne’e ho motor mamuk hela deit, maibe ágora ne’e ita lori tama ba Bairro sira ne’e nunka hola Ikan Talin ida” dehan Agustino
Negosian Agustino kontinua, Sosa iha Bero nain ka peskador sira ho folin $.1.00 depois faan fali kada tali 1 ho folin $ 2.00 maibe susar atu hetan sosa nain hanesan uluk molok tama iha Ambito EE no SS tanba Covid-19 ne’e.
“Ami sosa husi Vero nain sira dolar ida ami fa’an fali halo dolar rua ne’e mak ágora ema la sosa dalaruma ami hatun to’o dolar ida lima pulu sen ne’e mos ema hola Talin ida rua deit, ne’ebé ami reza ba aman maromak iha Tempu badak moras Covid19 ne’e hotu ona ba,tanba ami terus liu ona,tanba ami nia servisu mak fa’an ikan ne’e ona hodi sustenta ami nia Família,,” Agustino informa iha tasi ibun suai Loro
Entertantu Peskador no Negosiante Ikan iha esperasa ba Governu bele hakotu ona Serka Sanitária no Estadu Emergensia EE hodi Povu bele halo sirkulasaun ba mai atu buka moris, Nune’e bele sustenta família uma laran.
Jornalista : Tynho Gusmao
Editor : Chamot Nahac
