Imelda:Fen no La’en Fahe Malu La Liu Dalan Legal-Haburas Kazu Abadonadu iha Covalima

Letratu: Kordenadora Pradet Fatin Hakmatek Suai Imelda Imaculada Moreira. FOTO RCCT/ Tynho Gusmão.

Covalima (RCCT) 15-12-21, Kordenadora Pradet Fatin Hakmatek Suai, Imelda Imaculada Moreira hateten Kazu Abandona sempre mosu iha Covalima, tanba dala barak Fen ho La’en husik malu la liu husi dalan legal, ho nune’e maka haburas Kazu Abandona iha Covalima.

Lia ne’e hato’o iha nia k’naar fatin Edifisiu Pradet Fatin Hakmatek Suai iha Kuarta Feira ohin (15/12).

“Tuir ami nia observasaun ne’e Fen La’en ne’ebé maka iha hanoin ne’ebé maka la hanesan hodi foti desizaun fahe malu, maibe fahe malu la liu husi dalan legal, hanesan Mane sai ne’e nia la mai ona, entaun ida ne’e impaktu ba feto maluk sira ne’ebé la iha servisu depende deit ba katuas oan, ne’ebé ida ne’e impaktu ba sira nia moris loro-loron” Imelda informa.

Cordenadora Imelda hatutan, mosu kazu abandona tanba Kauza husi Ekonómia.

“Kazu abandona mosu tanba kauza mos husi Ekonómia, tanba dala barak Feto depende deit ba mane, tanba dalaruma hola malu ne’e feto iha Uma deit, depois kuandu Mane sira husik derpente entaun feto sira atu ba los ne’ebé, atu halo negósiu maibe se maka ajuda sira” Imelda dehan.

Entretantu husi tinan 2016 to’o agora Pradet Covalima suporta ona Kliente sira ne’ebé identifika Kazu Abandona hamutuk 60 resin, nune’e bele halo negósiu hodi sustenta moris loro loron nian.

Jornalista : Tynho Gusmão

Editór       : Chamot Nahac