Iha Tangki Be–Populasaun 218 iha Aldeia Maubesi Nafatin Infrenta Menus Asesu Be Mos

Letratu: Komunidade Aldeia Maubesi, Suku beiseuk, Asesu Be Mos husi Tangki ne’ebe CVTL Hari iha 2005/Foto RCCT/J.Lopez

Covalima (RCCT) 08-05-22–Komunidade uma kain 58 kompostu husi populasaun 218 iha Aldeia Maubesi, Suku Beiseuk, Postu Administrativu Tilomar, kontinua infrenta problema konaba be mos maske antes ne’e Cruz Vermella Timor Leste (CVTL) Filial Covalima Konstrui ona tangki hodi fornese be mos ba komunidade sira.

Xefe Iha Aldeia Maubesi informa ba RCCT, hahu tinan 2000 to’o tinan 2005, Komunidade Aldeia Maubesi Infrenta ona Susar asesu be mos, no iha inisiu tinan 2005, CVTL Filial Covalima halo Projetu kanalizasaun be no hari tangki ida hodi fornese be mos ba komunidade maibe tanba kondisaun tangki ne’e ki’ik nune’e lato’o atu hodi fornese be mos inklui komunidade uma kain 58, populasaun 218 iha Aldeia Maubesi tenki la’o sa’e tun foho wainhira atu asesu be iha tangki ne’e.

Husi 2000 mai ne’e komunidade susar mak we mos, husi Kruz Vermella halo tangki ne’e iha 2005 mak ami uja ne’e, maibe Be ne’e lato’o ba ami tanba bak ne’e ki’ik, pois ne’e dok tan Informa Xefe Aldeia Maubesi, Agapito de Jesus ba RCCT.

Xefe Aldeia ne’e kontinua, Iha Aldeia Maubesi distansia ba komunidade sira atu la’o hodi asesu ba be mos kuaze metru 300 resin, maibe komunidade tenki la’o hodi sa’e rai lolon no kondisaun estrada mos ladi’ak.

Komunidade ba iha we ne’e, distansia metru atus tolu resin, ne’e la’o ho ain deit, kadang kadang balu ho motor, pois la’o ne’e sa’e tan foho no dalan at.” Tenik Xefe Aldeia Maubesei.

Letratu: Xefe Aldeia Maubesi, Suku Beiseuk, Agapito de Jesus/Foto RCCT/Jerfy RastaQ

Ho nune’e reprezenta Populasaun 218 iha Aldeia Maubesi, Suku Beiseuk, Agapito de Jesus husu ba Governu atu bele dada be hodi hakbesik liu ba komunidade nia hela fatin.

Hakarak ne’e estadu dada be ne’e mai ami k’nua laran, tanba ami hare be ne’e bele dada sa’e mai besik ami, tan agora ami atu ba kuru be ne’e la’o sa’e, depois fila mai ne’e lori be todan pois la’o tun deit, ne’e todan.” Agapito Hakotu.

Relasiona ho atu halo kaptulasaun husi tangki primeiru lori be mai besik Komunidade sira iha Aldeia Maubesi, Suku Beiseuk, CVTL Filial Covalima laiha ona kompotensia ba kestaun ne’e tanba CVTL Covalima Intrega ona Tangki be ne’e ba Autoridade sira no Liu husi grupu Manutensaun be mos iha Aldeia hodi kaer jestaun, maibe CVTL Covalima tenta atu halo fali advokasia ho ajensia seluk hodi bele hare lisuk ba naksalak be mos ne’ebé komunidade sira iha Aldeia Maubesi infrenta ne’e.

Antes dada be, ita halo base line, survey no mos atu hala’o treinamentu ba Grupu Manutensaun be mos ne’ebé hanaran GMF mak hare ba jestaun ne’e, sira na’in mak tenki kontinua, Ita Hand over ona be ita mos persija hare fila fali, ho numeru populasaun ne’e barak ka uitoan, depois ita halo advokasia husi parte seluk mak kontinua mos di’ak liu tan” Informa Koordenador CVTL Filial Covalima, Domingos Gavrila Amaral ba RCCT via telefone Domingo(08/05).

Aleinde iha Iha Aldeia Maubesi Suku Beiseuk, dadus balu ne’ebé RCCT Rekolla, iha Aldeia Baer Suku Beiseuk,Komunidade sira Infrenta Problema ho Be mos, ne’ebé mak durante tinan barak ona Komunidade sira Konsumu deit be mos husi mota, tan ne’e Komunidade sira bele komsumu deit be mos/mon iha tempo bailoro, maibe iha tempo udan komunidade obrigadu tenki konsumu be merak no balu se’i udan ben ba nesesidade uma laran.

No mos iha Postu Administrativu Fohorem, iha Suku Fohorem Vila husi Total Populasaun na’in 1,532, Populasaun 287 iha Aldeia Lorokida sei menus asesu ba be mos, liu liu iha tempo bailoro.

Entretantu to’o Notisia ne’e hatun RCCT seidauk halo konfirmasaun ho Autoridade Munisipal sira ne’ebé iha kompotensia relevante ho asuntu Be mos iha area Rural.

Jornalista : J.Lopez/Jefry RastaQ

Editor       : Chamot Nahac