Covalima (RCCT) 26-07-21 Inan Faluk Terezina Gusmão moris ho kondisaun difisiénsia, hela iha Aldeia Lela Suco Holpilat Postu Administrativu Maukatar, nebe durante ne’e seidauk hetan subsídiu husi Governo, hodi hatodan nia moris loro-loron no susar ba ai-han.
Liga ho asunto ne’e ko’alia ba Jornalista RCCT Ponto Fokal Raes Hadomi Timor Oan (RHTO) iha Municipio Covalima Rogito Amaral informa, RHTO trata hela Terezina Gusmão nia dokumentos hodi halo diagnósa ba nia kondisaun difisiénsia iha Ospital Referal Suai ho nune’e inan faluk difisiénsia ne’e kategoria Grau 3 (Tres).
“Tia Terezina hanesan ami nia kliente, iha fulan kotuk nia hetan fos, ami mos trata hela nia dokumentos hanesan karta atestadu médiku iha Ospital Referal Suai, ami hasoru Doutor hodi halo dignósa ba nia kondisaun difisiénsia, entaun mana Terezina ne’e hetan duni Grau 3” Rogito ne’e dehan iha Edifisio MSSI Covalima nia oin.
Rogito Amaral informa liu tan, dadaun ne’e RHTO relata ona dokumentos ba iha Sentru Solidariedade Municipio Covalima, atu nune’e, Inan faluk difisiensia Terezina Gusmão bele hetan Subsidiu husi Governo.
“ Agora ami hatama relata ona Terezina Gusmão nia dokumentos ba iha MSSI iha Covalima, atu nune’e nia bele hetan nia direito hanesan Subsidiu husi Governo kada Fulan ne’en (6) ” Rogito Amaral Esplika.
Diretor Sentru Solidariedade Sosial Muncipio Covalima Agapito Axis hateten, dadus Difisiensia nebe maka identifikadu ona, Sentru Solidariedade Sosial Covalima sei esforsu, atu nune’e tempo badak sira bele hetan sira nia direito.
“Dadus maluk difisiensia nebe maka identifikadu, ita sei apoio aihan ba sira soke problema maka trasporte atu fahe ba maluk difisiensia nebe iha area rurais, depois tuir lista ne’e iha prosessu nebe servisu hamutuk ho RHTO para ita bele atende ba maluk difisiensia nebe maka seidauk hetan nia direito” Agapito Axis dehan iha nia kna’ar fatin.
Enkuanto inan Faluk Difisiensia Terezina Gusmao seidauk hetan subsidiu husi Governo, tanba ne’e durante ne’e sente terus no susar ba aihan tanba la iha ema ruma maka atu buka osan ba nia hodi responde nesesidades nebe maka nia enfrenta kada loron.
Jornalísta : Tynho Gusmão
Editor : Chamot Nahac
