HAMNASA Realiza Formasaun Saúde Inkluzaun Ba Pessoal Saúde Sira Iha Covalima

Pessoal Saúde sira tuir formasaun konaba Saúde Inkluzaun iba Hotel Joya Suku Kamenasa. Foto RCCT)Tynho Gusmão

Covalima (RCCT) 14-12-21, Organizasaun Hamutuk Nasaun Saudavel (HAMNASA) realiza formasaun konaba Saúde Inkluzaun ba pessoal Saúde sira hodi hasa’e sira nia koñesimentu konaba oinsa bele atende didi’ak pasiente sira ne’ebé mai ho kondisaun Difisénsia.

Ba Jornalísta sira Paul Vasconselhos husi Organizasaun HAMNASA, hateten Formasaun ne’e realiza, tanba tuir monografia númeru ema ho difisénsia as iha Municipio Covalima.

“Formasaun ne’e objetivu atu hasa’e sira nia koñesimentu oinsa bele atendementu ne’ebe di’ak ba ema ne’ebe Difisénte, nomos labele halo diskrimasaun tantu ema ho Difisénte no la Difisénte, tanba ita hare tuir monografia númeru ema ho difisénsia iha Munisipiu ne’e a’as los, tanba ne’e maka Ita realiza formasaun ne’e para ita nia Médiku sira bele komprende” Paul dehan iha Hotel Joya Suku Kamenasa (14/12).

Paul informa formasaun ne’e realiza tanba hetan apoio fundus husi Governu Australia.

” Aktividades ne’e realiza tanba ita hetan fundus husi Governu Australia, desde Fulan Outubru ne’e sei to’o iha tinan oin, maibe total ladun fiksu, ne’ebe hau labele mensiona tanba iha Programa barak” Paul informa.

Reprezentante Diretór Servisu Saúde Municipio Covalima Agapito de Jesus informa, durante ne’e parte husi Saúde halo atendimentu di’ak, maibe la iha fasilidades ba ema ho difisénsia.

“Ita nia fasilidades Saúde sira halo atendimentu direta ho di’ak, soke fasilidades Saúde sira seidauk iha rampa, rampa ne’e siknifika Fatin ka kadeira roda karik sira bele sae ba kama leten so ida ne’e maka seidauk maibe balun estabelese ona husi RHTO, no balun maka seidauk” Agapito dehan iha intervista iha Hotel Joya Suku Kamenasa.

Entretantu formasaun ne’e realiza tanba hetan fundus husi Governu Australia, Servisu hamutuk entre Organizasaun HAMNASA ho Institutu Nasional Saúde Timor Leste.

Entretantu Formasaun ne’e realiza iha Hotel Joya Suco Kamenasa durante loron 4 ne’ebé hahu ohin, ne’ebé partisipa husi Pessoal Saúde husi Sentru Saúde no Pessoal Saude ne’ebé servisu iha Postu Saúde inklui Hospital ne’ebe lokaliza iha Covalima.

Jornalista : Tynho Gusmão

Editór       : Chamot Nahac