Covalima (RCCT) 15-09-21, Relasiona ho Situasaun Pandemia Covid-19 nebe prezudika prosessu Aula prezensial iha Eskola sira, maka Ministériu Edukasaun Joventude no Desportu (MEDJ) distribui ona rezumu matéria ezame Nasional ba Eskola sira.
Nune’e Diretor Eskola Sekundaria Geral Publika Suai (ESGP) Francelino Freitas Carvalho hateten, ESGP Suai hahu prepara ona rezumu matéria ezame Nasional, atu distribui hodi fasilita Estudante Finalista sira oinsa bele partisipa iha ezame Nasional ho di’ak.
” Matéria sira ne’e mai husi MEJD, iha semana kotuk ne’e maka Edukasaun Munisipiu entrega mai iha Eskola, rezumu matéria ne’e relasiona ho situasaun Covid-19 ita hare aula prezensial lao ladun diak, entaun Ministériu iha hanoin ida oinsa maka bele fasilita Estudante Finalista sira tuir ezame nasional ho di’ak “ Francelino Informa iha Fatin Biblioteka ESGP.
Tuir dadus Estudante Finalista iha ESGP Suai kuaze atus Hitu (700) kompostu husi Programa Ciensia Sosiais no Ciensia Teknologia.
” Ami nia Estudante Finalista iha ESGP kuaze atus Hitu (700), nebe matéria nemos mai ne’e ba Ciensia Sosiais 350, depois ba Ciensia Teknologia 350, maibe ami sei identifika matéria ne’e apar ho ami nia númeru Estudante ka lae” Diretor dehan.
Entretantu matéria hirak ne’e Professor da turma sira maka sei distribui direta ba Estudante Finalista sira.
Jornalísta : Tynho Gusmão
Editor : Chamot Nahac
