Covalima (RCCT) 20-11-21 Ministru Assuntu Kombatente Libertasaun Nasional (MAKLN) Julio Sarmento da Costa “Meta Malik” hateten halo’ot Saudozu Sesurai iha nia rezidénsia ne’e hanesan provizoriu deit, tanba ne’e Governu sei esforsu hodi hasai Saudozu Sesurai hodi halo’ot iha fatin ne’ebe merese ba Veteranus sira.
Governante ne’e dehan bainhira partisipa iha serimónia funebre ba Saudozu “Sesurai” iha nia rezidénsia Tabakolot Suco Debos Sesta-Feira (19/11).
” Veteranus sira hotu ha’u nia hakohak bo’ot ba imi, ohin la hakoi iha metinaru maibe hakoi iha uma oin, preokupasaun imi nia hato’o iha loron hira, nusa mak Sesurai la hakoi iha Metinaru, maibe ida ne’e responsabilidade Governu ida ne’e nian, ne’ebe ida ne’e provizoriu deit, Estadu sei hasai nia tau iha fatin ne’ebe merese ba Veteranus hotu-hotu iha Suai” Governante ne’e dehan
Governante ne’e agradese ba Uma Lisan Puh Gewen ne’ebe hetan fini di’ak “Sesurai” hanesan ema ne’ebe brani hodi kontribui maka’as ba Luta Libertasaun Nasional.
” Ha’u agradese ba uma lisan Puh Gewen tanba bele hetan fini di’ak ida ne’ebe halibur ema hotu la hare husi se, nia brani tebes hodi partisipa kontribui maka’as ba Luta Libertasaun Nasional” Meta Malik dehan.
Iha fatin ne’e Xefe Estadu Maior FALINTIL Forsa Defeza de Timor-Leste, Brigadeiru General Calisto Santos “Coliati” rekoñese Saudozu “Sesurai” hatudu ezemplu ne’ebe di’ak ba Jerasaun foun sira tanba iha domin ba nia Povu no Nasaun ida ne’e.
” Sesurai ema ne’ebe iha domin ba nia Povu no Nasaun ida ne’e, tanba ne’e ita nia Saudozu hatudu ezemplu ne’ebe di’ak ba Jerasaun foun sira atu banati tuir hadomi malu kria paz no estabilidade atu nune’e politiku na’in sira bele iha planu dezenvolvimentu di’ak hodi responde funu naruk ne’ebe ita halo tiha ona” Coliati dehan iha Serimónia funebre ba Saudozu “Sesurai”.
Molok halo Serimónia funebre ba Saudozu “Sesurai”, Povu Covalima hamutuk ho Veteranus no familia sira Selebra misa funebre ba Saudozu “Sesurai” iha Igreja Ave Maria Suai ne’ebe prejidi husi Pe.Sebastião Eugénio da Cruz Correia no Partisipa husi Ministru Assuntu Kombatente Libertasaun Nasional (MAKLN), Brigadeiru General Calisto Santos “COLIATI”, Autoridade sira iha Munisipiu Covalima, inklui Seguransa PNTL no F-FDTL.
Entretantu hafoin remata missa funebre, Kontinua halo translasaun mate isin Saudozu “Sesurai” husi igreja Ave Maria Suai hodi halo Serimónia funebre iha nia rezidénsia Sesta-Feira horiseik (20/11).
Jornalísta : Tynho Gusmão
Editor : Chamot Nahac
