Covalima (RCCT) 29-07-21, Sekretariu Administrasaun Municipio Covalima hamutuk ho Diretor linha Sektorais sira iha Covalima, konvoka reuniaun iha Salaun Administrasaun Municipal, hodi halo diskusaun kona ba Orsamento Tinan 2022 nebe Governo aloka mai iha Municipio Covalima.
Ba Jornalista sira Sekretariu Administrasaun Municipio Covalima Afonsu Nugueira Nahak hateten, ba tinan 2022 Governo aloka Orsamentu ba Munisipiu Covalima hamutuk dolares Amerikanu $ 3,652.651, Afonsu Nugueira informa total orsamento ne’e hodi aloka ba Postu Administrativu hitu no Diresaun servisu Municipal sira.
“ Ohin ami diskusaun atu dezangrega ba Orsamento ba iha diresaun servisu Munisipal, laos Diresaun delegasaun territorial, tamba ne’e maka orsamento ne’ebe mai Munisipio Covalima hamutuk, ita biha deit $ 3,652.651, total orsamento ne’e maka ita fahe ba Diresaun Servisu Munisipal sira ho Postu Administrativo sira ” dehan Afonsu Nugueira Nahak
Afonsu Nugueira Nahak salient liu tan katak, bainhira orsamento ne’e la to’o, sei tau iha orsamento adisional hodi ba halo submisaun iha loron 7 Fulan Agostu, nia informa Loron 13 Fulan Agostu Admiistrador Municipio Covalima Francisco de Andrade sei apresenta Orsamento ne’e iha Ministeriu Administrasaun Estatal.
“Iha Municipio Covalima iha Diresaun 18 no Postu Administrativu hitu, no bainhira orsamentu hirak ne’e koloka ba kada postu no Diresaun sira ne’e maka la to’o, ita sei tau iha adisional hodi halo submisaun iha dia 6 ou dia 7 de agustu depois dia 13 Administrador Municipio sei ba apresenta orsamentu ne’e ba iha Ministériu Administrasaun Estatal (MAE)” Sekretario Administrasaun Afonsu dehan iha nia kna’ar fatin.
Enkuanto Diretor linha Sektorais sira iha Covalima hamutuk ho Administrador Postu hitu sei kontinua halo diskusaun ba orsamentu ne’e, tanba seidauk hatene lolos, atu aloka orsamento hira ba kada Postu no Diresaun, Afonsu Nugueira hatuta, liu husi diskusaun ba orsamento ne’e, nia parte konsidera salariu ba Funsionariu permanente no Funsionáriu ajente administrasaun publiku importante.
“ importante liliu mak ho ita nia kazuais sira ne’e tenke preve uluk, Depois tau importansia ba Programa Merenda Eskolar no orsamentu suco ba 2022, ohin diresaun servisu Municipal no postu Administrativu sira kontinua halo diskusaun,Tanba kada postu no Diresaun ida idak seidauk hatene los kona ba alokasaun orsamentu hira hira, nebe ohin la hotu sei Kontinua halo diskusaun” hakotu Afonsu Nugueira Nahak.
Jornalísta : Aje Ferreira
Editor : Chamot Nahac
