Garanti Beleja Lensa ESGP Suai-Estudante Finalista Hari Gazebo Iha Resintu Eskola

Covalima (RCCT) 23-09-22–Diretór Eskola Sekundaria Geral Publika (ESGP) Suai Franselino Freitas Carvalho apresia ho estudante finalista anu Letivu 2022 nia inistiva hari Gazebo Unidade 12 iha resintu eskola nian hodi halo ilas liu beleja ESGP Suai.

Intensaun rai hela lembransa furak iha iha ESGP Suai mak mak Estudante finalista sira hato’o ideia ne’e ba Gabineti Eskola no mos Inan aman atu bele hetan apoiu no aprovasaun.

“Hakarak informa katak molok estudante sira halo pondok ne’e, sira informa Gabineti no mos ba inan aman katak estudante sira sei husik hela lembransa molok husik hela eskola ida ne’e,mak sira kria pondok kada turma ida, pondok ida ne’e inisiativa husi estudante sira depois mai iha Gabineti diretiva husu mos husi parte inan aman iha inkontru simu kaderneta iha fulan kotuk” Informa Diretór ESGP Suai Franselino Freitas Carvalho ba RCCT

Diretór ESGP Suai esklarese, Estudante Sira mak kontribui rasik osan kada ema ida sentavu lima nulu hodi sosa material no fasilita hahan no be iha tempu estudante sira hari Gazebo ne’e. No osan ne’e mai husi kontribuisaun inan aman sira, tanba ne’e wainhira estudante sira atu halo aktividade ruma mak eskola sei informa mos ba inan no aman sira.

Lembransa ida husi estudante sira, hakarak hato’o deit ba inan aman katak sa deit mak estudante sira atu halo ne’e inan aman tenki hatene, ne’ebe redus orsamentu husi estudante sira kada ema ida 50 sen, ne’e sira sosa deit sementi ho fasilita sira halo pondok ne’e sira bele han no hemu” Franselino Klarifika

Tanba ne’e Diretór ESGP Suai konsidera idea ne’eebe mak estudante finalista sira hasaun hodi hari Gazebo ne’e, Idea Briliante hodi rai hela lembransa ba sira nia alin estudante foun ne’ebé sei mai eskola iha ESGP Suai.

“Hakarak agradese ba estudante finalista sira inisia ida ne’e, antes sira husik ESGP Suai sira rai hela mahon ida ba sira nia alin no mos agradese ba inan aman tanba liu husi sira nia apoiu ba inisiativa hari pondok ida ne’e, importante eskola mos agradese tanba inisiativa ne’e mai husi estudante sira” tenik Franselino

Gazebo ne’ebé kakuluk falun ho du’ut no inventa ho sasan ujadu, hanesan antena ka taxu parabola ne’e, rin halo ho besi no fondasi haforsa ho raihenek kahur semente ne’e Estudante Finalista sira hari iha kada Aula ne’ebé eziste iha ESGP Suai hamotuk unidade 12.

No mos Gazebo ne’e hari atu sai hanesan fatin hakmatek ba estudante sira hodi halo konversa no troka hanoin no mos hodi halo ilas liu tan ESGP Suai nia Beleja.

Alende ne’e Profesor da turma sira mos akompaña hodi fo motivasaun ba estudante finalista sira iha prosesu hari Gazebo iha resintu ESGP Suai ne’e.

Jornalista : Jefry RastaQ

Editor      : Chamot Nahac